Tafsir sa Sura الحشر sa ماراناو gikan sa Maranao - Maranao translation
Verse 1
Pthasbik ko Allah so nganin a zisii ko manga langit go so zisii ko lopa; go Skaniyan so Mabagr, a Mawngangn.
Skaniyan so piyakaawa Iyan so miyamangongkir a pd ko tiyoronan ko kitab phoon ko manga darpa iran, sii ko paganay a kalimod. Da niyo tarimaa o ba siran makaawa: Na aya tarima iran na mataan! a siran na kharn siran o manga kota iran phoon ko (siksa o) Allah, na miyatalingoma siran o (sogoan o) Allah sa di iran mapipikir, go inipansir Iyan ko manga poso iran so kalk, na iningggba iran ko manga walay ran so manga lima iran, go so manga lima o miyamaratiyaya, na kowaa niyo a thoma, hay adn a manga kaylay niyan!
Verse 3
Na o da kiran kokomn o Allah so kaawa, na mataan a ziksaan Iyan siran ko doniya; go bagian iran sii ko akhirat so siksa ko naraka.
Verse 4
Giyoto man na sabap ko mataan! a siran na siyorang iran so Allah go so sogo Iyan: Na sa taw a sorangn iyan so Allah, na mataan! a so Allah na Mayloti-kapaniksa.
Verse 5
Sadn sa piyata iyo a korma odi na giyanatan iyo to a khipakatitindg, ko manga itado niyan, na sabap sa idin o Allah, go an Iyan mapakarondan so manga songklid.
Verse 6
Na so piyakitaban o Allah ko Sogo Iyan a phoon kiran, - na da niyo to kapakiprondai sa koda, odi na onta: Na ogaid na so Allah na pakiphangarasiyan Iyan ko manga sogo Iyan so taw a kabaya Iyan: Na so Allah sii ko langowan taman na Gaos Iyan.
So piyakitaban o Allah ko Sogo Iyan a phoon ko taw ko manga ingd, na rk o Allah, go rk o Rasol, go rk o manga dadasg o Rasol, go so manga wata a ilo, go so manga miskin, go so miyakaalang sa lalan, ka an di khabaloy a mipthotogalin ko lt o manga kawasa rkano. Na sadn sa inibgay rkano o Rasol, na kowaa niyo skaniyan, go sadn sa inisapar iyan rkano skaniyan na gnkn iyo. Na kalkn iyo so Allah. Mataan! a so Allah na Mayloti-kapaniksa.
Verse 8
Rk o pkhakamrmran a miyamagoyag, a so piyamogaw siran ko manga darpa iran, go so manga tamok iran, a pphloloba siran sa gagaw a phoon ko Allah, go kasosoat, go pthabangan iran so (agama o) Allah go so sogo Iyan: Siran man na siran i mimamataan;
Verse 9
Go so khitatakna ko ingd, go so paratiyaya a miyaonaan iran, na pkhababayaan iran so miyamagoyag kiran, go da a khatoon iran ko manga rarb iran a siig phoon ko inipamgay kiran, go inilawan iran ko manga ginawa iran, apiya pn adn a zisii kiran a kamiskin. Na sa taw a ipilak iyan so kaligt o ginawa niyan, na siran man na siran i phamakaslang sa maliwanag;
Verse 10
Go so miyamakawma ko oriyan iran, na gi iran tharoon: "Kadnan ami, napii kaming Ka, ago so manga pagari ami a so kiyawna an kami ran ko paratiyaya, go ding Ka thagoi so manga poso ami sa siig ko siran a miyamaratiyaya. Kadnan ami, mataan! a Ska i Malai-gagaw, a Makalimoon."
Verse 11
Bang ka da maylay so siran a miyamanangin? Gi iran tharoon ko manga pagari ran a so miyamangongkir a pd ko tiyoronan ko kitab a: "Ibt o pakaawa a kano na mataan a pd kami niyo dn a magawa, go da a pagonotan ami a sorang rkano a isa bo sa dayon sa dayon, go o phamonoa kano na mataan a tabangan ami skano dn". Na so Allah na zasaksian Iyan a mataan! a siran na titho a manga bokhag.
Verse 12
Mataan a o pakaawaa siran na di siran bo pd a magawa, go mataan a o pamonoa siran na di iran siran bo thabangan, go mataan a apiya tabangan iran siran na mataan a ithalikhod iran bo so manga likod iran, oriyan iyan na di siran katabangan.
Verse 13
Mataan a skano i lbi a ipkhalk iran sii ko manga rarb iran, a di so Allah, giyoto man na sabap sa mataan! a siran na pagtaw a di phamanabot.
Verse 14
Di siran rkano makipmbonoay, sa ba siran matataayon, inonta o sii ko manga ingd a khikokotaan, odi na sii ko kaaltan sa manga tambak. So gi iran kambobono ko ltlt iran na mitataralo. Arangan ka kiran na matataayon, a so manga poso iran na masasagomparak: Giyoto man na sabap ko mataan! a siran na pagtaw a di phamanabot.
Verse 15
Lagid o siran a miyaonaan iran sa marani, kiyataaman iran so karata o olawla iran; go adn a bagian iran a siksa a malipds.
Verse 16
Izan o shaytan gowani a tharoon iyan ko manosiya a: "Ongkir ka, na kagiya a makaongkir na pitharo iyan a: ´Mataan! a sakn na angiyas ako rka; mataan! a sakn na i ikhalk akn so Allah, a Kadnan o manga kaadn´!"
Verse 17
Na miyabaloy so khaakiran sa dowa oto a mataan! a siran na khatago ko naraka, a makakakal siran on. Na giyoto man i balas ko manga darowaka.
Verse 18
Hay so miyamaratiyaya, kalkn iyo so Allah; go pamimikirana o ginawa so miniona niyan a rk o gawii a phakasambi. Na kalkn iyo so Allah, mataan! a so Allah na Kaip Iyan so gii niyo nggolawlaan.
Verse 19
Na di niyo zowaa so piyakalipatan iran so Allah, na piyakilipatan iyan kiran so manga ginawa iran. Siran man na siran so manga songklid!
Verse 20
Di magizan so manga taw ko naraka ago so manga taw ko sorga. So manga taw ko sorga na siran i miyamakaslang sa maliwanag.
Verse 21
O initoron Ami angkai a Qor´an ko palaw, na maylaing ka dn skaniyan a makapangalimbabaan, a manga bbngkag, phoon sa kalk ko Allah. Na giyoto man so manga ibarat a phagmbaalan Ami skaniyan ko manga manosiya, ka an siran makapphamimikiran.
Verse 22
Skaniyan so Allah, so da a tohan inonta Skaniyan; katawan Iyan so gaib ago so mapayag; Skaniyan so Masalinggagaw, a Makalimoon.
Verse 23
Skaniyan so Allah, so da a tohan inonta Skaniyan, a Phapaar, a Soti, a Pphamgay sa kalilintad, a Pphamgay sa kasasarig, a Masiyap, a Domadaag, a Mamndg, a Diyaitan o kala. Soti so Allah mawatan ko ipphanakoto iran!
Verse 24
Skaniyan so Allah, a Pphangadn, a Giimbaas a Giimbontal; rk Iyan so manga ngaran a manga pipiya: Pthasbik Rkaniyan so nganin a zisii ko manga langit ago so lopa; go Skaniyan so Mabagr, a Mawngangn.
تقدم القراءة