Tafsir sa Sura المؤمنون sa ماراناو gikan sa Maranao - Maranao translation
Verse 1
ﭑﭒﭓ
ﭔ
Sabnar a phakadaag so miyamaratiyaya,
Verse 2
ﭕﭖﭗﭘﭙ
ﭚ
So siran sii ko sambayang iran na somasangkop siran,
Verse 3
ﭛﭜﭝﭞﭟ
ﭠ
Go so siran sii ko ilang na tatalikhodan iran,
Verse 4
ﭡﭢﭣﭤ
ﭥ
Go so siran sii ko zakat na inggogolalan iran,
Verse 5
ﭦﭧﭨﭩ
ﭪ
Go so siran sii ko manga kayaan iran na sisiyapn iran,
Verse 6
Inonta sii ko manga karoma iran, odi na so miyakhapaar o manga tangan iran, - ka mataan! a siran na di siran on mapzoman,
Verse 7
Na sadn sa mamagingar sa salakaw roo, na siran man na siran i mimamalawani;
Verse 8
ﭾﭿﮀﮁﮂ
ﮃ
Go siran sii ko manga sarig kiran, go so diyandi kiran na sisiyapn iran,
Verse 9
ﮄﮅﮆﮇﮈ
ﮉ
Go siran sii ko manga sambayang iran na papaliharaan iran;
Verse 10
ﮊﮋﮌ
ﮍ
Siran man na siran i manga waris,
Verse 11
ﮎﮏﮐﮑﮒﮓ
ﮔ
Siran i makaphangowaris ko (sorga) Firdaws: Sa ron siran on dn makakakal.
Verse 12
(Ibt ka) Sabnsabnar a inadn Ami so manosiya a phoon ko rasa a phoon ko lipaw;
Verse 13
ﮝﮞﮟﮠﮡﮢ
ﮣ
Oriyan iyan na biyaloy Ami skaniyan a mani sii ko darpa a matotongkop,
Verse 14
Oriyan iyan na inadn Ami so mani a rogo a mbabathik; na inadn Ami so rogo a mbabathik a saporon a sapo; na inadn Ami so saporon a sapo a manga tolan, na biyongkosan Ami so manga tolan sa sapo; oriyan iyan na inadn Ami skaniyan sa kaadn a salakaw. Na Maporo so Allah, a tanto a mapiya ko mithatakdir!
Verse 15
ﯜﯝﯞﯟﯠ
ﯡ
Oriyan iyan na mataan! a skano ko oriyan oto, na matatangkd a phamatay kano.
Verse 16
ﯢﯣﯤﯥﯦ
ﯧ
Oriyan iyan na mataan! a skano ko alongan a qiyamah, na pagoyagn kano.
Verse 17
Na sabnsabnar a inadn Ami ko kaporoan iyo so pito a manga lalan (a manga langit); go da ko btad Ami i ba Ami kalilipati so manga kaadn.
Verse 18
Na piyakatoron Ami phoon ko kawang so ig a madidiyangka, na piyakatarg Ami skaniyan ko lopa; na mataan! a Skami sii ko kaylang oto na sabnar a Gaos Ami.
Verse 19
Na piyakathoan Ami rkano sa sabap rkaniyan sa manga pamomolan a manga korma, go manga anggor a rk iyo: Katatagoan oto sa manga onga a madakl: Go so sabaad on na pkhakan iyo,
Verse 20
Go kayo a pphakagmaw ko palaw a Torisayna, a phagtho sa lana, go dilota a bagian o gii khakan.
Verse 21
Na mataan! a adn a bagian iyo ko manga ayam a titho a ndao: Pphakainomn Ami skano ko matatago ko manga tiyan iran (a gatas); go adn a bagian iyo ron a manga gona a madakl; go so sabaad on na pkhakan iyo;
Verse 22
ﮉﮊﮋﮌ
ﮍ
Go pkharoran kano kiran, go sii ko manga kapal.
Verse 23
Na sabnsabnar a siyogo Ami so Noh ko pagtaw niyan: Na pitharo iyan: "Hay pagtaw akn, simbaa niyo so Allah! Da a tohan iyo a salakaw Rkaniyan. Ino kano di phananggila?"
Verse 24
Na pitharo o manga nakoda ko siran a miyamangongkir ko pagtaw niyan a: "Kna ini a ba di manosiya a lagid iyo; a khabayaan iyan a kaombawan kano niyan: Na o kabaya o Allah na mataan a tomoron sa malaikat: Da tano man´g angkai ko manga loks tano a miyangaoona."
Verse 25
"Da ko skaniyan inonta na mama a tataraponan: Na thigri niyo skaniyan taman ko masa (a kada iyan)."
Verse 26
ﯧﯨﯩﯪﯫ
ﯬ
Pitharo iyan: "Kadnan ko! tabangi akong Ka: Sabap ko kiyapakambokhaga iran rakn!"
Verse 27
Na iniilaham Ami sii rkaniyan a: "Mbaal ka sa kapal sii ko manga kaylay Ami go so sogoan Ami: Na amay ka makawma so sogoan Ami, na mamangiliphowak (a ig) ko daporan, na prorang ka on ko oman i ngganapa sa dowa, go so taalok rka, inonta so taw a miyaona on so katharo a pd kiran: Go ding ka Rakn pagangaya so mindadarowaka; ka mataan! a siran na pagldn siran."
Verse 28
Na amay ka makathakna ka, ska ago so manga pd ka ko kapal, na tharoang ka: "So podi na rk o Allah, a so siyabt kami Niyan phoon ko pagtaw a manga darowaka."
Verse 29
Go tharoang ka: "Kadnan ko, pakatpada kong Ka ko khatpadan a piyakandaklan sa mapiya: Ka Ska i lbi a Mapiya ko pphamakatpad."
Verse 30
Mataan! a adn a madadalm roo a titho a manga tanda, go mataan a tatap a Skami i titho a Pphaniyoba.
Verse 31
ﭲﭳﭴﭵﭶﭷ
ﭸ
Oriyan iyan na miyadn Kami ko oriyan iyan sa pagtaw a manga salakaw.
Verse 32
Na siyogoan Ami siran sa sogo a pd kiran (sa pitharo iyan:) "Simbaa niyo so Allah! Da a tohan iyo a salakaw Rkaniyan. Ino kano di phananggila?"
Verse 33
Na pitharo o manga nakoda ko pagtaw niyan a so miyamangongkir go piyakambokhag iran so kitmo ko akhirat, go piyamgan Ami siran sa limo ko kawyagoyag ko doniya a: "Kna ini a ba di manosiya a lagid iyo; a pkhan ko pkhn iyo, go phaginom ko phaginomn iyo."
Verse 34
"Na ibt o onot kano sa manosiya a lagid iyo, na mataan! a skano samawto na titho a manga logi,"
Verse 35
"Ino Niyan rkano ndiyandiin i mataan! a skano na amay ka matay kano go mbaloy kano a botha, go manga tolan, na mataan! a skano na phamakagmawn (ko manga kobor)?"
Verse 36
ﯖﯗﯘﯙﯚ
ﯛ
"Miyakawatawatan so ipndiyandi rkano!"
Verse 37
"Daa kawyag a rowar ko kawyagoyag tano ko doniya. Phamatay tano na pkhawyag (so manga wata) tano. Na kna a ba tano phangaooyag (zaroman)!"
Verse 38
"Da ko skaniyan inonta na mama a inangkob iyan so Allah sa kabokhag, na di tano skaniyan pamaratiyayaan!"
Verse 39
ﯴﯵﯶﯷﯸ
ﯹ
Pitharo iyan: "Kadnan ko! tabangi akong Ka: Sabap ko kiyapakambokhaga iran rakn."
Verse 40
ﯺﯻﯼﯽﯾ
ﯿ
Pitharo (o Allah): "A di mathay na mataan a khabaloy siran dn a mamakasndit!"
Verse 41
Na miyadansal siran o lalis, a minggolalan ko bnar, na biyaloy Ami siran a apt! Na kapakawatan (ko limo) a bagian o pagtaw a manga darowaka!
Verse 42
ﰊﰋﰌﰍﰎﰏ
ﰐ
Oriyan iyan na miyadn Kami ko oriyan iran sa manga pagtaw a manga salakaw.
Verse 43
Dikhaktng o pagtaw so adiyal iyan, go di iran khisonggod.
Verse 44
Oriyan iyan na siyogo Ami so manga sogo Ami a miyakathataliwana: Oman i makawma ko pagtaw a sogo kiran, na pakambokhagn iran skaniyan: Na initondog Ami ko sabaad kiran so sabaad: Go biyaloy Ami siran a manga tothol: Na kapakawatan (ko limo) a bagian o pagtaw a di siran mapaparatiyaya!
Verse 45
Oriyan iyan na siyogo Ami so Mosa, go so pagari niyan a Haron, rakhs o manga tanda Ami go so katantowan a mapayag,
Verse 46
Sii ko Pir´awn go so manga nakoda ko pagtaw niyan: Na mimaratabat siran: Go miyabaloy siran a pagtaw a miphapaporo.
Verse 47
Na pitharo iran: "Ino tano pharatiyayaa so dowa kataw a lagid tano? A so pagtaw iran na sii siran rktano pphangongonotan!"
Verse 48
ﮉﮊﮋﮌ
ﮍ
Na piyakambokhag iran a dowa oto, na miyabaloy siran a pd ko miyangabibinasa.
Verse 49
ﮎﮏﮐﮑﮒﮓ
ﮔ
Na sabnsabnar a inibgay Ami ko Mosa so kitab, ka an siran makaontol.
Verse 50
Na biyaloy Ami so wata o Maryam ago si ina iyan a tanda: Go piyakakadn Ami siran ko bobongan, a adn a pantar iyan go bowalan.
Verse 51
Hay manga sogo, kang kano ko manga pipiya (a pangn´ngkn), go nggalbk kano sa mapiya: Mataan! a Sakn na so gii niyo ngalbkn na katawan Ko.
Verse 52
Na mataan! a giyai okit iyo a okit a isa, go Sakn i Kadnan iyo: Na onoti Ako niyo.
Verse 53
Na pizaropt iran so okit iran ko ndolondolonan iran, sa kazaropt, a mbidabida: Oman i isa ka sagorompong na so kpit iran na pkhababayaan iran.
Verse 54
ﯣﯤﯥﯦﯧ
ﯨ
Na ganating ka siran ko kaada i kiran sa mlng taman ko masa (a kapamatay ran).
Verse 55
Ba iran tatangkapa sa mataan! a so ipmbgay Ami kiran oto a tamok go manga wata,
Verse 56
Na pnggagaanan Ami kiran so manga pipiya? Kna, ka di iran maiin´ngka.
Verse 57
Mataan! a so siran a phoon ko kasasangkop ko Kadnan iran na maalk siran;
Verse 58
ﰂﰃﰄﰅﰆ
ﰇ
Go so siran a so manga ayat o Kadnan iran i paparatiyayaan iran;
Verse 59
ﰈﰉﰊﰋﰌ
ﰍ
Go so siran a so Kadnan iran na di iran iphanakoto;
Verse 60
Go siran a pphammgay siran ko inipammgay ran a so manga poso iran na somasangkop, sa mataan! a siran na sii siran bo ko Kadnan iran phamakandod;
Verse 61
Siran man i gii magoradorad ko manga pipiya, go siran i phangaoona on.
Verse 62
Na da a iphaliyogat Ami ko baraniyawa a rowar ko khagaos iyan: Na zisii Rkami so kitab a gii tharo ko bnar: Na siran na di siran kasalimbotan.
Verse 63
Kna, ka so manga poso iran na matatago ko kalilipati sangkai; go adn a bagian iran a manga galbk a salakaw roo, a siran na aya iran gagalbkn,
Verse 64
Taman sa igira a piyakadansal Ami ko piyamgan kiran sa limo so siksa, na samawto na siran na nggoraok siran sa tabang!
Verse 65
(Tharoon kiran a:) "Di kano nggoraok sa tabang sa alongan nai; mataan! a skano na di kano khatabangan phoon Rkami."
Verse 66
"Sabnar a miyabaloy so manga ayat Akn a pphangadian rkano, na bakano dn miyangndod ko manga talikhodan iyo,
Verse 67
ﮝﮞﮟﮠ
ﮡ
"A pmamaratabatan iyo skaniyan: Gii niyo thothotholaan ko gagawi a ikagogowad iyo."
Verse 68
Ba iran da nggdagdaa so katharo, antawaa ba kiran miyakaoma so da makatalingoma ko manga loks iran a miyangaoona?
Verse 69
Ba iran da makilala so sogo kiran, ago iran pagongkira skaniyan?
Verse 70
Ino iran gii tharoa i: "Tataraponan skaniyan?" Kna, ka minioma niyan kiran so bnar, na kadaklan kiran a so bnar na ikagogowad iran.
Verse 71
Na o inonotan a bnar so manga kabaya iran, na miyabinasa dn so manga langit ago so lopa, go so madadalm kiran. Kna, ka initalingoma Mi kiran so ndao kiran, na siran na so ndao kiran na tiyalikhodan iran.
Verse 72
Ba ka kiran phangni sa sokay? Na so sokay o Kadnan ka i tomo: Go Skaniyan i lbi a Mapiya ko pphamamgay sa riskhi.
Verse 73
ﯿﰀﰁﰂﰃ
ﰄ
Na mataan! a ska na sabnar a pthawagn ka siran ko lalan a matitho;
Verse 74
Na mataan! a so di iran paparatiyayaan so akhirat na so lalan na, sabnar a sisilayan iran.
Verse 75
Na o inikalimo Ami siran go piyokas Ami kiran so misosogat kiran a morala, na tomataros siran dn ko kadadadag iran, a gii siran mromparompak.
Verse 76
Na sabnsabnar a piyaka dansal Ami kiran so siksa, na da siran sangkop ko Kadnan iran, go di siran phangangarapan!
Verse 77
Taman sa kagiya a lomka Kami kiran sa isa a pinto a adn a siksa on a sangat: Na samawto na siran na kiyadaan siran roo sa panginam!
Verse 78
Na Skaniyan so miyadn rkano ko manga kan´g, go so manga kaylay, go so manga gdagda: Na miyakayto ito a kapphanalamat iyo!
Verse 79
Go Skaniyan so miyarmbad rkano ko lopa, go Ron kano plimoda.
Verse 80
Go Skaniyan so Pphangoyag go Pphangimatay, go kapaar Iyan so gii kapakazambi o gagawii ago so dawndaw: Ino kano di pnggdagda?
Verse 81
ﮔﮕﮖﮗﮘﮙ
ﮚ
Kna, ka pitharo iran so lagid o pitharo o miyangaoona.
Verse 82
Pitharo iran: "Ino amay ka matay kami go mbaloy kami a botha, go manga tolan (a miyarophod), ba mataan! a skami na pagoyagn kami dn?"
Verse 83
"Sabnsabnar a minidiyandi rkami skami ago so manga loks ami angkai gowani. Da ko ungkai inonta na manga iringa a kabokhag o miyangaoona!"
Verse 84
Tharoang ka: "Antawaa i khirk ko lopa ago so matatago on, o skano na katawi niyo?"
Verse 85
ﯛﯜﯝﯞﯟﯠ
ﯡ
Na ptharoon iran dn a: "Rk o Allah!". Tharoang ka a: "Ino kano di phananadm?"
Verse 86
Tharoang ka: "Antawaa i khirk ko manga langit a pito, go Khirk ko aras a mala?"
Verse 87
ﯫﯬﯭﯮﯯﯰ
ﯱ
Ptharoon iran dn a: "Rk o Allah". Tharoang ka a: "Ino kano di phananggila?"
Verse 88
Tharoang ka: "Antawaa i sii sa tangan iyan so kapaar ko langowan taman, go skaniyan i ppakalinding, go da a phakarn on, o skano na katawi niyo?"
Verse 89
ﰁﰂﰃﰄﰅﰆ
ﰇ
Ptharoon iran dn a: "Rk o Allah". Tharoang ka: "Na andamanaya i kapkhalimpang iyo?"
Verse 90
ﭑﭒﭓﭔﭕ
ﭖ
Kna, ka initalingoma Mi kiran so bnar: Na mataan! a siran na titho a manga bokhag!
Verse 91
Da kowa so Allah sa wata Iyan, go da a miyabaloy a pd Iyan a tohan: O adn a pd Iyan na bisaan dn o oman i isa a tohan so inadn iyan, go pgsn dn o sabaad kiran so sabaad. Soti so Allah! mawatan ko iphropa iran!
Verse 92
ﭲﭳﭴﭵﭶﭷ
ﭸ
Katawan Iyan so gaib ago so mapayag: Na maporo a ka-aawat Iyan ko ipphanakoto iran (On)!
Verse 93
ﭹﭺﭻﭼﭽﭾ
ﭿ
Tharoang ka: "Kadnan ko, obang Ka rakn phakimasai so ididiyandi kiran, -
Verse 94
ﮀﮁﮂﮃﮄﮅ
ﮆ
"Kadnan ko! na di akong Ka mbaloya a pd ko pagtaw a manga darowaka!"
Verse 95
Na mataan! a Skami sii ko kapakimasai Ami rka ko ididiyandi Ami kiran na sabnar a khagaga Mi.
Verse 96
Rnn ka so lbi a mapiya ko marata: Skami i Matao ko pphamrakn iran.
Verse 97
Na tharoang ka: "Kadnan ko, mlindong ako Rka phoon ko manga pangonsi o manga shaytan."
Verse 98
ﮢﮣﮤﮥﮦ
ﮧ
"Go mlindong ako Rka Kadnan ko! ka oba siran rakn makadasg."
Verse 99
Taman sa igira miyakaoma, ko isa kiran so kapatay, na matharo iyan: "Kadnan ko, pakakasoya kong Ka (sa doniya);
Verse 100
"Kaan ako makanggolawla sa mapiya ko minibagak akn. Na di dn oto mapnggolawla! ka mataan aya! a sii bo sa katharo a: skaniyan i mitharo on"; go sii ko kasasangoran iran so paglt taman ko gawii a kawyaga kiran.
Verse 101
Na amay ka iyopn so sanggakala, na da a kambangnsa ko ndolondolonan iran sa alongan oto, go di siran makapamagizai!
Verse 102
ﯱﯲﯳﯴﯵﯶ
ﯷ
Na sadn sa makapnd so manga timbang iyan, - na siran man na siran i phamakadaag:
Verse 103
Na sadn sa makakhap so manga timbang iyan, na siran man so inilang iran so manga ginawa iran; sii siran makakakal ko naraka Jahannam.
Verse 104
ﰃﰄﰅﰆﰇﰈ
ﰉ
Pthotongn so manga paras iran o apoy, a siran roo na khipakasasangingi.
Verse 105
(Ptharoon kiran:) "Ba da mabaloy so manga ayat Akn a pkhabatiya rkano, na skano na piyakambokhag iyo skaniyan?"
Verse 106
Tharoon iran: "Kadnan ami, miyapgs kami o okor ami a marata, go miyabaloy kami a pagtaw a manga dadag!"
Verse 107
"Kadnan ami, pakaawaa kaming Ka (ko naraka): Na o kasowi ami (so kaongkir), na mataan! a skami na manga darowaka!"
Verse 108
ﭫﭬﭭﭮﭯ
ﭰ
Tharoon Iyan: "Kikips kano san! go di kano gii tharo!"
Verse 109
Mataan aya! a adn a sabaad ko manga oripn Ko, a gi iran tharoon: "Kadnan ami! miyaratiyaya kami; na napii kaming Ka, go kalimoon kaming Ka: Ka Ska i lbi a Mapiya ko pphamangalimo!"
Verse 110
"Na kinowa niyo siran a pagrg, taros a miyakatmbang siran rkano ko tadm Rakn, go miyabaloy kano a gii niyo siran ikhakala!
Verse 111
"Mataan! a Sakn na biyalasan Ko siran sa alongan nai sabap ko kiyaphantang iran: Mataan! a siran na siran i miyamakaslang sa maliwanag."
Verse 112
Tharoon Iyan: "Ay kiyathay niyo ko lopa ko bilangan o manga ragon?"
Verse 113
Tharoon iran: "Aya kiyathi ami na salongan odi na sabaad sa salongan: Na izaan ka ko manga pagiitong."
Verse 114
Tharoon Iyan: "Da a kiyathay niyo a rowar ko mayto; o mataan! a skano na aya btad iyo na katawan niyo!"
Verse 115
"Ba niyo tiyangkap sa aya bo a kiyaadna Mi rkano na karimbaran, go mataan! a skano na di kano Rkami phakandodn?"
Verse 116
Na Maporo so Allah, a Phapaar, a Bnar: da a tohan a inonta Skaniyan, a Kadnan o aras a piphiyapiyaan!
Verse 117
Na sadn sa manongganoy, a irimbang iyan ko Allah, sa tohan a salakaw, a da a karina niyan on; na so imbadal on na sii dn ko Kadnan iyan. Mataan aya! a di phakadaag so manga kafir!
Verse 118
Na tharoang ka: "Kadnan ko! napi Ka, go pangalimo Ka! ka Ska i lbi a Mapiya ko pphamangalimo."
تقدم القراءة