Surah سورة النجم

Verse 1

ﭑﭒﭓ ﭔ

(Allāhu búra pẹ̀lú) ìràwọ̀ nígbà tí ó bá jábọ́.

Verse 2

ﭕﭖﭗﭘﭙ ﭚ

Ẹni yín kò ṣìnà, kò sì sọnù.

Verse 3

ﭛﭜﭝﭞ ﭟ

Àti pé kò níí sọ̀rọ̀ ìfẹ́-inú.

Verse 4

ﭠﭡﭢﭣﭤ ﭥ

Kò níí sọ ohun kan tayọ ìmísí tí A fi ránṣẹ́ sí i.

Verse 5

ﭦﭧﭨ ﭩ

Alágbára (ìyẹn, mọlāika Jibrīl) l’ó kọ́ ọ ní ìmọ̀ (al-Ƙur’ān).

Verse 6

ﭪﭫﭬ ﭭ

Ó ní àlàáfíà t’ó péye. Nítorí náà, ó dúró wámúwámú,

Verse 7

ﭮﭯﭰ ﭱ

nígbà tí ó wà nínú òfurufú lókè pátápátá.

Verse 8

ﭲﭳﭴ ﭵ

Lẹ́yìn náà, ó sún mọ́ (Ànábì). Ó sì sọ̀kalẹ̀ (tọ̀ ọ́ wá).

Verse 9

ﭶﭷﭸﭹﭺ ﭻ

(Àlàfo ààrin àwọn méjèèjì) sì tó ìwọ̀n ọrún ọfà méjì, tàbí kí ó kéré (sí ìyẹn).
____________________
Ẹ wo ìtọsẹ̀-ọ̀rọ̀ fún sūrah al-Baƙọrah; 2:74.

Verse 10

ﭼﭽﭾﭿﮀ ﮁ

Allāhu sì fún ẹrúsìn Rẹ̀ ní ìmísí t’Ó fún un.

Verse 11

ﮂﮃﮄﮅﮆ ﮇ

Ọkàn (Ànábì) kò parọ́ ohun t’ó rí.

Verse 12

ﮈﮉﮊﮋ ﮌ

Ṣé ẹ óò jà á níyàn nípa ohun t’ó rí ni?

Verse 13

ﮍﮎﮏﮐ ﮑ

Àti pé dájúdájú ó rí i nígbà kejì
____________________
Gbólóhùn “rọ’āhu” jẹyọ nínú āyah yìí. Ó tún jẹyọ bẹ́ẹ̀ nínú sūrah at-Tẹkwīr; 81:23. Ìtúmọ̀ rẹ̀ sì ni pé, “Ànábì Muhammad (sollalāhu 'alayhi wa sallam) rí i.” Ta ni ó rí? Ṣé Allāhu ni tàbí mọlāika Jibrīl? Àní sẹ́, ta ni ọ̀rọ̀ arọ́pò-orúkọ ẹnì kẹta yìí “hu” t’ó jẹyọ nínú gbólóhùn yìí ń tọ́ka sí? Kí á má gbàgbé pé āyah yẹn ń sọ̀rọ̀ nípa ìrìn-àjò òru àti ìgun sánmọ̀ tí Ànábì Muhammad (sollalāhu 'alayhi wa sallam) ṣe ni.
Èsì: Àwọn igun kan nínú àwọn àáfà sọ pé, mọlāika Jibrīl ni Ànábì Muhammad (sollalāhu 'alayhi wa sallam) rí. Igun kejì sì sọ pé, Allāhu (subhānahu wa ta'ālā) ni ó rí, bí ó tilẹ̀ jẹ́ pé igun yìí fi kún un pé ọkàn l’ó fi rí Allāhu, kì í ṣe ojú. Ṣebí bí ẹ̀dá ṣe ní ojú ìta, ni ó ní ojú inú. Àmọ́ èyí tí ó gbéwọ̀n jùlọ lọ́dọ̀ ọ̀pọ̀lọ́pọ̀ àwọn onímọ̀ ẹ̀sìn ’Islām ni pé, orúkọ mọlāika Jibrīl ('alaehi-ssọlātu wa-ssalām) ni “hu” yẹn ń rọ́pò. Ìdí tí èyí fi rí bẹ́ẹ̀ ni hadīth tí ìyá wa ‘Ā’iṣah (rọdiyallāhu 'anhā) gbàwá lórí ọ̀rọ̀ náà pé, “Èmi ni àkọ́kọ́ nínú ìjọ yìí tí ó béèrè nípa ìyẹn lọ́dọ̀ Òjíṣẹ́ Allāhu (sollalāhu 'alayhi wa sallam). Ó sì sọ pé. “Jibrīl ni mo rí.” (Muslim). Bákan náà, nínú ẹ̀gbàwá Abū Tharr (rọdiyallāhu 'anhu), ó sọ pé, mo bi Òjíṣẹ́ Allāhu ní ìbéèrè pé, “Ṣé o fojú rí Olúwa rẹ bí?” Ànábì (sollalāhu 'alayhi wa sallam) sì sọ pé: “Ìmọ́lẹ̀ kan (dí mi lọ́wọ́), báwo ni mo ṣe máa rí I nígbà náà!” (Muslim) Irú èyí náà l’ó ṣẹlẹ̀ sí Ànábì Mūsā ('alaehi-ssọlātu wa-ssalām) gẹ́gẹ́ bí ó ṣe wà nínú sūrah al-’A‘rọ̄f; 7:143.
Tọ́ọ̀, ó ṣeé ṣe kí á rí ọ̀rọ̀ mìíràn kan láti ọ̀dọ̀ àwọn Sọhābah (r.ahm.), bíi ọ̀rọ̀ tí ó tọ̀dọ̀ Ọmọ ‘Abbās (rọdiyallāhu 'anhu) wá pé, “Ànábì (sollalāhu 'alayhi wa sallam) fi ọkàn rẹ̀ rí Allāhu ni.” Ìyẹn ni pé, ó fojú inú rí I, kì í ṣe ojú ìta. Kíyè sí i, kò sí ọ̀rọ̀ kan tí ó lágbára tó èyí tí ó tọ̀dọ̀ Ànábì fúnra rẹ̀ wá tààrà lórí ọ̀rọ̀ náà. Ẹ̀gbàwá ‘Ā’iṣah àti ẹ̀gbàwá Abū Tharr sì ni ẹ̀gbàwá t’ó ti ọ̀dọ̀ Ànábì (sollalāhu 'alayhi wa sallam) wá lórí ọ̀rọ̀ náà. Má ṣe fọkàn sí ibò míìràn. Àti pé, sūrah al-’Ani‘ām; 6:103 àti sūrah aṣ-Ṣūrā; 42:51 ti fi rinlẹ̀ pé, ojú kan kò lè fojú rinjú pẹ̀lú Allāhu, yálà fún gbígba iṣẹ́ òjíṣẹ́ láti ọ̀dọ̀ Allāhu tàbí fún n̄ǹkan mìíràn. Àmọ́ sá, rírí Allāhu sójú máa wáyé fún àwọn onígbàgbọ́ òdodo nìkan lọ́jọ́ Àjíǹde. Èyí sì wà ní ìbámu sí sūrah al-Ƙiyāmọh; 75:22-23.

Verse 14

ﮒﮓﮔ ﮕ

níbi igi sidirah al-Muntahā,

Verse 15

ﮖﮗﮘ ﮙ

nítòsí rẹ̀ ni Ọgbà Ibùgbé (gbére) wà.

Verse 16

ﮚﮛﮜﮝﮞ ﮟ

(Rántí) nígbà tí ohun t’ó bo igi Sidirah bò ó mọ́lẹ̀.

Verse 17

ﮠﮡﮢﮣﮤ ﮥ

Ojú (Ànábì) kò yẹ̀, kò sì tayọ ẹnu-àlà.

Verse 18

ﮦﮧﮨﮩﮪﮫ ﮬ

Dájúdájú ó rí nínú àwọn àmì Olúwa rẹ̀, t’ó tóbi jùlọ.

Verse 19

ﮭﮮﮯ ﮰ

Ẹ sọ fún mi nípa òrìṣà Lāt àti òrìṣà ‘Uzzā,

Verse 20

ﮱﯓﯔ ﯕ

àti Mọnāh, òrìṣà kẹta mìíràn.
____________________
Ẹ wo ìtọsẹ̀-ọ̀rọ̀ fún sūrah al-Hajj 22:52.

Verse 21

ﯖﯗﯘﯙ ﯚ

Ṣé ọmọkùnrin ni tiyín, ọmọbìnrin sì ni tiRẹ̀?

Verse 22

ﯛﯜﯝﯞ ﯟ

Ìpín àbòsí nìyẹn nígbà náà.

Verse 23

ﯠﯡﯢﯣﯤﯥﯦﯧﯨﯩﯪﯫﯬﯭﯮﯯﯰﯱﯲﯳﯴﯵﯶﯷﯸﯹﯺ ﯻ

(Àwọn orúkọ òrìṣà wọ̀nyẹn) kò sì jẹ́ kiní kan bí kò ṣe àwọn orúkọ kan tí ẹ̀yin àti àwọn bàbá yín fi sọ (àwọn òrìṣà yín fúnra yín). Allāhu kò sì sọ ẹ̀rí ọ̀rọ̀ kan kalẹ̀ nípa rẹ̀. Wọn kò sì tẹ̀lé kiní kan bí kò ṣe àròsọ àti ohun tí ẹ̀mí (wọn) ń fẹ́. Ìmọ̀nà kúkú ti dé bá wọn láti ọ̀dọ̀ Olúwa wọn.

Verse 24

ﯼﯽﯾﯿ ﰀ

Tàbí ti ènìyàn ni n̄ǹkan t’ó bá ń fẹ́!

Verse 25

ﰁﰂﰃ ﰄ

Ti Allāhu sì ni ọ̀run àti ayé.

Verse 26

ﰅﰆﰇﰈﰉﰊﰋﰌﰍﰎﰏﰐﰑﰒﰓﰔﰕﰖﰗ ﰘ

Àti pé mélòó mélòó nínú àwọn mọlāika t’ó wà nínú àwọn sánmọ̀, tí ìṣìpẹ̀ wọn kò níí rọ̀ wọ́n lọ́rọ̀ kiní kan àyàfi lẹ́yìn ìgbà tí Allāhu bá yọ̀ǹda fún ẹni tí Ó bá fẹ́, tí Ó sì yọ́nú sí.

Verse 27

ﭑﭒﭓﭔﭕﭖﭗﭘﭙ ﭚ

Dájúdájú àwọn tí kò ní ìgbàgbọ́ òdodo nínú Ọjọ́ Ìkẹ́yìn, àwọn ni wọ́n ń fún àwọn mọlāika ní orúkọ obìnrin.

Verse 28

ﭛﭜﭝﭞﭟﭠﭡﭢﭣﭤﭥﭦﭧﭨﭩﭪﭫﭬ ﭭ

Kò sí ìmọ̀ kan fún wọn nípa rẹ̀. Wọn kò sì tẹ̀lé kiní kan bí kò ṣe àròsọ. Dájúdájú àròsọ kò sì níí rọrọ̀ kiní kan lára òdodo.

Verse 29

ﭮﭯﭰﭱﭲﭳﭴﭵﭶﭷﭸ ﭹ

Nítorí náà, ṣẹ́rí kúrò ní ọ̀dọ̀ ẹni t’ó kẹ̀yìn sí ìrántí Wa, tí kò sì gbèrò kiní kan àfi ìṣẹ̀mí ayé.

Verse 30

ﭺﭻﭼﭽﭾﭿﮀﮁﮂﮃﮄﮅﮆﮇﮈﮉﮊ ﮋ

Ìyẹn ni òdíwọ̀n (àti òpin) ìmọ̀ wọn. Dájúdájú Olúwa rẹ, Ó nímọ̀ jùlọ nípa ẹni t’ó ṣìnà kúrò lójú ọ̀nà Rẹ̀. Ó sì nímọ̀ jùlọ nípa ẹni t’ó mọ̀nà.

Verse 31

ﮌﮍﮎﮏﮐﮑﮒﮓﮔﮕﮖﮗﮘﮙﮚﮛ ﮜ

Ti Allāhu ni ohunkóhun t’ó wà nínú àwọn sánmọ̀ àti ohunkóhun t’ó wà nínú ilẹ̀ nítorí kí Ó lè san àwọn t’ó ṣe iṣẹ́ aburú ní ẹ̀san ohun tí wọ́n ṣe níṣẹ́ àti nítorí kí Ó lè san àwọn t’ó ṣe iṣẹ́ rere ni ẹ̀san rere.

Verse 32

ﮝﮞﮟﮠﮡﮢﮣﮤﮥﮦﮧﮨﮩﮪﮫﮬﮭﮮﮯﮰﮱﯓﯔﯕﯖﯗﯘﯙﯚﯛﯜﯝﯞﯟﯠ ﯡ

Àwọn t’ó ń jìnnà sí ẹ̀ṣẹ̀ ńlá ńlá àti ìwà ìbàjẹ́ àyàfi àwọn ẹ̀ṣẹ̀ pẹ́ẹ́pẹ̀ẹ̀pẹ́, dájúdájú Olúwa rẹ gbòòrò ní àforíjìn. Ó nímọ̀ jùlọ nípa yín nígbà tí Ó ṣẹ̀dá yín láti inú ilẹ̀ àti nígbà tí ẹ wà ní ọlẹ̀ nínú àwọn ikùn ìyá yín. Nítorí náà, ẹ má ṣe fọra yín mọ́. Ó nímọ̀ jùlọ nípa ẹni t’ó bẹ̀rù (Rẹ̀).

Verse 33

ﯢﯣﯤ ﯥ

Sọ fún mi nípa ẹni t’ó gbúnrí (kúrò níbi òdodo),

Verse 34

ﯦﯧﯨ ﯩ

tí ó fi díẹ̀ tọrẹ, tí ó sì di ìyókù mọ́wọ́!

Verse 35

ﯪﯫﯬﯭﯮ ﯯ

Ṣé ìmọ̀ ìkọ̀kọ̀ wà ní ọ̀dọ̀ rẹ, tí ó sì ń rí i (pé ẹlòmíìràn l’ó ma bá òun jìyà lọ́run)?

Verse 36

ﯰﯱﯲﯳﯴﯵﯶ ﯷ

Tàbí wọn kò fún un ní ìró ohun t’ó wà nínú tírà (Ànábì) Mūsā ni,

Verse 37

ﯸﯹﯺ ﯻ

àti (tírà Ànábì) ’Ibrọ̄hīm, ẹni t’ó mú (òfin Allāhu) ṣẹ,

Verse 38

ﯼﯽﯾﯿﰀ ﰁ

pé dájúdájú ẹlẹ́rù-ẹ̀ṣẹ̀ kan kò níí ru ẹrù-ẹ̀ṣẹ̀ ẹlòmíìràn.
____________________
Ẹ wo ìtọsẹ̀-ọ̀rọ̀ fún sūrah an-Nahl; 16:25.

Verse 39

ﰂﰃﰄﰅﰆﰇ ﰈ

Àti pé kò sí kiní kan fún ènìyàn àfi ohun t’ó ṣe níṣẹ́.

Verse 40

ﰉﰊﰋﰌ ﰍ

Àti pé dájúdájú iṣẹ́ rẹ̀, láìpẹ́ wọ́n máa fi hàn án.

Verse 41

ﰎﰏﰐﰑ ﰒ

Lẹ́yìn náà, wọ́n máa san án ní ẹ̀san rẹ̀, ní ẹ̀san t’ó kún jùlọ.

Verse 42

ﰓﰔﰕﰖ ﰗ

Àti pé dájúdájú ọ̀dọ̀ Olúwa rẹ ni òpin (ìrìn-àjò ẹ̀dá).

Verse 43

ﰘﰙﰚﰛ ﰜ

Dájúdájú Òun l’Ó ń pa (ẹ̀dá) ní ẹ̀rín. Ó sì ń pa (ẹ̀dá) ní ẹkún.

Verse 44

ﰝﰞﰟﰠ ﰡ

Dájúdájú Òun l’Ó ń sọ (ẹ̀dá) di òkú. Ó sì ń sọ (ẹ̀dá) di alààyè.

Verse 45

ﭑﭒﭓﭔﭕ ﭖ

Dájúdájú Òun l’Ó dá ẹ̀dá ní oríṣi méjì, ọkùnrin àti obìnrin,
____________________
Ẹ̀dá ènìyàn ni èròǹgbà nínú āyah yìí, kì í ṣe ẹ̀dá mìíràn. Āyah 46 l’ó fi èyí rinlẹ̀.

Verse 46

ﭗﭘﭙﭚ ﭛ

láti ara àtọ̀ nígbà tí wọ́n bá dà á sínú àpòlùkẹ́.

Verse 47

ﭜﭝﭞﭟ ﭠ

Dájúdájú Òun l’Ó máa ṣe ìṣẹ̀dá ìkẹ́yìn fún àjíǹde,

Verse 48

ﭡﭢﭣﭤ ﭥ

Dájúdájú Òun l’Ó ń ṣe púpọ̀, Ó sì ń ṣe kékeré (oore fún ẹ̀dá).

Verse 49

ﭦﭧﭨﭩ ﭪ

Dájúdájú Òun sì ni Olúwa ìràwọ̀ Ṣi‘rọ̄ (tí wọ́n sọ di òrìṣà).

Verse 50

ﭫﭬﭭﭮ ﭯ

Dájúdájú Òun l’Ó pa ìran ‘Ād rẹ́, àwọn ẹni àkọ́kọ́;

Verse 51

ﭰﭱﭲ ﭳ

àti ìran Thamūd, kò sì ṣẹ́ wọn kù;

Verse 52

ﭴﭵﭶﭷﭸﭹﭺﭻﭼﭽ ﭾ

àti ìjọ Nūh t’ó ṣíwájú (wọn), dájúdájú wọ́n jẹ́ alábòsí jùlọ, wọ́n sì tayọ ẹnu-àlà jùlọ;

Verse 53

ﭿﮀ ﮁ

àti ìlú tí wọ́n dàwó (ìlú Ànábì Lūt) t’Ó yẹ̀ lulẹ̀ (láti òkè).

Verse 54

ﮂﮃﮄ ﮅ

Ohun t’ó bò wọ́n mọ́lẹ̀ bò wọ́n mọ́lẹ̀.

Verse 55

ﮆﮇﮈﮉ ﮊ

Nítorí náà, èwo nínú ìdẹ̀ra Olúwa rẹ ni ìwọ (ènìyàn) ń jà níyàn?

Verse 56

ﮋﮌﮍﮎﮏ ﮐ

Èyí ni ìkìlọ̀ kan nínú àwọn ìkìlọ̀ àkọ́kọ́.

Verse 57

ﮑﮒ ﮓ

Ohun t’ó súnmọ́ súnmọ́.
____________________
“Ohun t’ó súnmọ́” jẹ́ ọ̀kan nínú àwọn orúkọ fún Ọjọ́ àjíǹde.

Verse 58

ﮔﮕﮖﮗﮘﮙ ﮚ

Lẹ́yìn Allāhu, kò sí ẹni t’ó lè ṣàfi hàn (Àkókò náà).

Verse 59

ﮛﮜﮝﮞ ﮟ

Ṣé ọ̀rọ̀ yìí l’ó ń ṣe yín ní kàyéfì?

Verse 60

ﮠﮡﮢ ﮣ

Ẹ̀ ń rẹ́rìn-ín, ẹ ò sì sunkún!

Verse 61

ﮤﮥ ﮦ

Afọ́nú-fọ́ra ni yín.

Verse 62

ﮧﮨﮩﮪ ﮫ

Nítorí náà, ẹ forí kanlẹ̀ fún Allāhu, kí ẹ jọ́sìn (fún Un).

Ìtumọ̀ سورة النجم

سورة النجم

Ìtumọ̀ Sura النجم ní اليورباوية láti الترجمة اليورباوية

الترجمة اليورباوية

الترجمة اليورباوية