ترجمة معاني سورة الأنعام باللغة ماراناو من كتاب Maranao - Maranao translation
ﰡ
آية رقم 1
So podi na rk o Allah, a so miyadn ko manga langit go so lopa, go miyadn ko manga lilibotng ago so sindaw. Oriyan aya na siran a miyamangongkir na so Kadnan iran na phrimbangn iran.
آية رقم 2
Skaniyan so miyadn rkano phoon sa lipaw, oriyan iyan na diniyangka Iyan so adiyal. Na so adiyal na miyapnto sii Rkaniyan; oriyan aya na skano na zasangka kano!
آية رقم 3
Go Skaniyan so Allah (a patot a pzimbaan) sii ko manga langit go so lopa. Katawan Iyan so isosoln iyo, go so ipapayag iyo, go katawan Iyan so gii niyo nggalbkn.
آية رقم 4
Na da a phakatalingoma kiran a ayat a pd ko manga ayat o Kadnan iran, a ba iran oto di ta talikhodi.
آية رقم 5
Na sabnar a piyakambokhag iran so bnar ko kiyapakawma niyan kiran: Na phakatalingoma kiran dn so manga totholan ko piyamagompat iran skaniyan (a siksa).
آية رقم 6
Ba iran da maylay a madakla bininasa Mi ko miyaonaan iran a pagtaw? A piyakikhapaar Ami kiran ko lopa so da Ami rkano phakikhapaarn, go biyotawanan Ami kiran so oran a margs, go biyaloy Ami so manga lawasayg a pphamangondas ko kababaan iran: Na bininasa Mi siran sabap ko manga dosa iran, go miyadn Kami ko oriyan iran sa pagtaw a manga salakaw.
آية رقم 7
Na opama ka tiyoronan Ami ska sa kitab a matatago sa karatas, go iran on miniskho so manga lima iran, na ptharoon dn o siran a da pamaratiyaya a: "Da a salakaw saya o rowar sa salamangka a mapayag!"
آية رقم 8
Na pitharo iran a: "Ino da pakatoroni skaniyan sa malaikat?" Na o tomiyoron Kami sa malaikat, na minitaman dn so khasowa, oriyan iyan na di kiran mapthataalik.
آية رقم 9
Na opama ka baloya Mi so sogo a malaikat, na matatangkd a khabaloy Ami skaniyan a mama, na mataan! a ba Ami siran dn kharimboti sa lagid o karirimboti kiran.
آية رقم 10
Na sabnsabnar a adn a piyamagompat a manga sogo ko miyaonaan ka; na kiyatangkalan so siran a miyamagrg kiran o piyamagompat iran (a siksa).
آية رقم 11
Tharoang ka a: "Ndalakaw kano ko lopa, na go niyo pagilaylaya o antonaa i miyambtad o kiya akiran ko miyamanaplis (ko bnar)."
آية رقم 12
Tharoang ka: "Antawaa i khirk ko nganin a zisii ko manga langit ago so lopa?" Tharoang ka a: "Rk o Allah. Tiyangkd Iyan ko ginawa Niyan so kapangalimo, plimodn kano Niyan dn ko alongan a qiyamah, a da a sangka a madadalm on. So siran a liyogi ran so manga ginawa iran, na siran i di khipaparatiyaya.
آية رقم 13
Na rk Iyan so nganin a miyakakadn ko gagawii ago so dawndaw; go Skaniyan so Pphakan´g; a Matao."
آية رقم 14
Tharoang ka: "Ba adn a salakaw ko Allah a khakowa ko a panarigan, a mimbaas ko manga langit ago so lopa? A Skaniyan i Pphagpr na di maphagpr." Tharoang ka a: "Mataan! a inisogo rakn a kabaloy akn a paganay a taw a mimbayorantang (ko Allah), na ding ka dn mbaloya a ginawang ka a pd ko manga pananakoto."
آية رقم 15
Tharoang ka a: "Mataan! a sakn na ikhalk akn amay ka sangkaan ko so Kadnan ko, so siksa ko alongan a lbi a mala."
آية رقم 16
"Sadn sa pakalidasn roo sa alongan oto, na sabnar a inikalimo skaniyan (o Allah); ka giyoto man so daag a mapayag."
آية رقم 17
"Na o sogati ka o Allah sa morala, na da a phakapokas on a rowar Rkaniyan; na o sogati ka Niyan sa mapiya, na Skaniyan sii ko langowan taman na Gaos Iyan."
آية رقم 18
"Go Skaniyan so Phakagaga, a makaoombaw ko manga oripn Iyan; go Skaniyan so Mawngangn, a Kaip."
آية رقم 19
Tharoang ka (ya Mohammad): "Antonaa shay´ i mala a saksi?" Tharoang ka a: "So Allah i saksi rakn ago sii rkano; go iniilaham rakn angkai a Qor´an, ka an akn rkano aya mipamakaiktiyar; ago sadn sa raotn iyan. Ba mataan! a skano na pzaksian iyo a mataan! a adn a pd o Allah a manga tohan a salakaw?" Tharoang ka a: "Di ko pzaksian!" Tharoang ka a: "Mataan! a Skaniyan bo i tohan a Isaysa, go mataan! a sakn na angiyas ako ko ipphanakoto niyo."
آية رقم 20
Na so siran a inibgay Ami kiran so kitab na makikilala iran (so Mohammad) lagid o kakililalaa iran ko manga wata iran. So liyogi ran so manga ginawa iran, na siran i di khipaparatiyaya.
آية رقم 21
Na ba adn a taw a lawan a salimbot a di so taw a inangkob iyan so Allah sa kabokhag, odi na piyakambokhag iyan so manga ayat Iyan? Mataan aya! a di phakadaag so manga salimbot.
آية رقم 22
Na sii ko alongan a kalimoda Mi kiran langon: Oriyan iyan na tharoon Ami ko siran a miyamanakoto a: "Anda so inipamanakoto niyo a siran na skano na ittgo niyo (a manga sakotowa o Allah)?"
آية رقم 23
Oriyan aya na da a mabaloy a rason iran a rowar sa katharoa iran sa: "Ibt ko Allah a Kadnan Ami, ka kna a ba Kami manga pananakoto."
آية رقم 24
Pamimikiranang ka, o andamanaya i kapakapmbokhaga iran ko manga ginawa iran. Go maylang kiran so inipangangkob iran (ko Allah).
آية رقم 25
Na adn a pd kiran a pphamakin´gn ka niyan; na tiyagoan Ami so manga poso iran sa manga pils, ka an iran oto di khasabot, go (tiyagoan Ami) so manga tangila iran sa kabngl; na apiya maylay ran so langowan o tanda, na di iran oto paratiyayaan; taman sa igira a miyakaoma siran rka, na pphamawaln ka iran; gii tharoon o siran a da pamaratiyaya a: "Da a salakaw saya a rowar sa manga iringa a kabokhag o miyangaoona."
آية رقم 26
Na siran na ipphanapar iran skaniyan (a Qor´an), go phagawatn iran skaniyan; na da a pkhabinasaan iran a rowar ko manga ginawa iran, sa di iran maiin´ngka.
آية رقم 27
Na o maylaing ka so masa a katarongkoa kiran ko naraka! Na matharo iran a: "Hay oba tano bo phakakasoya (ko doniya)! ka di tano pakambokhagn so manga ayat o Kadnan tano, go mabaloy tano a pd ko miyamaratiyaya!"
آية رقم 28
Kna, ka pphayag kiran so piyagma iran sa paganay. Na o pakakasoya siran, na pagndodan iran dn so inisapar kiran, ka mataan! a siran na titho a manga bokhag.
آية رقم 29
Na pitharo iran a: "Da a kawyagoyag a rowar ko kawyagoyag tano ko doniya, go di tano pagoyagn (ko oriyan o kapatay)."
آية رقم 30
Na o maylaing ka so masa a kapakatindga kiran ko hadapan o Kadnan iran! a tharoon Iyan a: "Ba ini di bnar?" Na tharoon iran a: "Ungkayno di, ibt ko Kadnan ami (ka bnar dn)!" Tharoon Iyan: "Na taami niyo so siksa, sabap ko kiyaongkir iyo."
آية رقم 31
Sabnar a miyalogi so siran a piyakambokhag iran so kimbaratmowaan ko Allah, - taman sa amay ka makawma kiran so bangkit a mitalmba, na matharo iran a: "Hay miyakazndit tano! Sa kiyandaraynon tano ko doniya;" a siran na kaa-awidan iran so manga dosa iran sii ko manga likod iran; tanodan ka miyakaratarata a kaa-awidi ran on.
آية رقم 32
Na da ko kawyagoyag ko doniya inonta na matag katmbangan go kabimbanan; na matatangkd a so ingd a mawri i taralbi a mapiya ko siran a khipanananggila. Ba da a manga sabot iyo?
آية رقم 33
Sabnar a katawan Ami a mataan aya! a mapakapmboko ka dn o katharo iran: Na mataan! a siran na kna a ba ka iran di bbnara: Na ogaid na so da pamaginontolan na so manga ayat o Allah na sasangkaan iran.
آية رقم 34
Na sabnsabnar a piyakambokhag so manga sogo ko miyaonaan ka: Na miphantang siran ko kiyapakambokhaga kiran, go so kiyaringasaa kiran, taman ko kiyapakatalingoma kiran o tabang Ami: Ka da a phakasambi ko manga katharo o Allah. Na sabnsabnar a adn a miyakaoma rka ko manga totholan ko manga sogo.
آية رقم 35
Na oba rka minirgn so kiyatalikhod iran, na o khagagang ka na ploloba ka sa okita ko lopa odi na towak ko langit a kasabapan sa kabging ka kiran sa tanda, - na o kabaya o Allah, na mataan! a khatimo Iyan siran ko toroan: Na oba ka mabaloy a pd ko da a manga mlng iyan!
آية رقم 36
Aya bo a tharima (ko ipphanolon ka) na so pphamakin´g on: Na so miyamatay, na pagoyagn siran o Allah; oriyan iyan na Ron siran phakandoda.
آية رقم 37
Na pitharo iran: "Ino da toroni skaniyan sa tanda a phoon ko Kadnan iyan?" Tharoang ka a: "Mataan! a so Allah na Gaos Iyan a kapakatoron Iyan sa tanda, na ogaid na kadaklan kiran a di manga tatao."
آية رقم 38
Na da a binatang ko lopa, go da a papanok a iphlantap iyan so mbala a papak iyan, a ba di manga pagtaw a manga lagid iyo. Da a linipha Ami ko kitab a mayto bo, oriyan iyan na sii siran plimoda ko Kadnan iran.
آية رقم 39
Na so siran a piyakambokhag iran so manga ayat Ami na manga bngl go manga omaw, - a matatago ko manga lilibotng: Sadn sa kabaya o Allah (a kadadag Iyan) na ndadagn Iyan: Go sadn sa kabaya Iyan (a katoro Iyan) na thagoon Iyan ko lalan a makaoontol.
آية رقم 40
Tharoang ka: "Ay gda iyo amay ka makatalingoma rkano so siksa o Allah, odi na makatalingoma rkano so bangkit, ba adn a salakaw ko Allah a kaphangnian niyo? - o skano i manga bnar!"
آية رقم 41
"Kna, ka Skaniyan bo i kaphangnian iyo, na pakaslangn kano Niyan sa maliwanag phoon ko tiyoba a mala a minitalmba rkano o kabaya Iyan, na kalipatan iyo so ipphamanakoto niyo Ron!"
آية رقم 42
Go sabnsabnar a siyogoan Ami so manga pagtaw ko miyaonaan ka, na piyakadansal Ami kiran so masikot, go so kapakathatalogdam, ka an siran makapangalimbabaan.
آية رقم 43
Na ino siran da pangalimbabaan gowani ko makawma kiran so siksa Ami? Na ogaid na badn tomigas so manga poso iran, go pipharasan kiran o shaytan so pinggolawla iran (a manga rarata).
آية رقم 44
Na kagiya a pakalipatan iran so sabap a kiyapakatadma kiran, na likaan Ami kiran so manga pinto o langowan taman, taman sa kagiya a ba siran dn miyasonor ko kiyabgi kiran, na siniksa Ami siran sa minitalmba, na samawto na siran na kiyadaan siran sa panginam!
آية رقم 45
Na miyathiphad so kaposan o pagtaw a da pamaginontolan. Na so podi na rk o Allah a Kadnan o manga kaadn.
آية رقم 46
Tharoang ka: "Ay gda iyo, amay ka kowaan o Allah so kan´g iyo go so manga kaylay niyo, go parkatn Iyan so manga poso iyo, ba adn a tohan a salakaw ko Allah a mibgay niyan rkano to?" Pamimikiranang ka so ropaan a gii Ami kazalinsalina magosay ko manga ayat; na oriyan iyan na siran na pthalikhodan iran.
آية رقم 47
Tharoang ka: "Ay gda iyo, amay ka makatalingoma rkano so siksa o Allah a mitalmba, odi na mapayag, ba adn a khabinasa a rowar ko pagtaw a da pamaginontolan?"
آية رقم 48
Na da a kiyasogo Ami ko manga sogo a rowar sa kapphamanothol iran sa mapiya, go giya kaphphamakiiktiyar iran ko marata: Na sadn sa maratiyaya, go mbilangataw, - na da a pangandam iran, go di siran makamboko (ko alongan a mawri).
آية رقم 49
Na so piyakambokhag iran so manga ayat Ami, - na khasogat siran o siksa, sabap ko da iran kapangongonotan.
آية رقم 50
Tharoang ka a: "Di ko rkano ptharoon i zisii rakn so khitatagoan ko manga kakawasaan o Allah, go di ko katawan so migagaib, go di ko rkano ptharoon i mataan! a sakn na malaikat. Da a khdgn ko a rowar ko iphagilaham rakn." Tharoang ka a: "Ba magizan so bota ago so pphakaylay?" Ino kano di phamimikiran?
آية رقم 51
Na pakiiktiyaring ka ini ko siran a ikaalk iran so kaplimoda kiran ko Kadnan iran a: Da a khakowa iran a salakaw ko Allah a Panarigan go da a phangongogopan: ka an siran makapananggila.
آية رقم 52
Go ding ka mbowangn so siran a pzimbaan iran so Kadnan iran ko kapitapita, go so kagabigabi, a singanin iran ko kasosoat o Allah. Na da a paliyogat rka ko kapphamagitonga kiran a mayto bo, go da a paliyogat kiran ko kapphamagitonga rka a mayto bo, ka misabap ko kibowangn ka kiran, a sabap a kabaloing ka a pd ko da pamaginontolan.
آية رقم 53
Na lagid aya a kiyatiyoba Ami ko sabaad kiran sabap ko sabaad, ka an iran matharo a: "Ba siran aya so inikalimo siran o Allah ko ndolon-dolonan tano?" Ba da so Allah a Matao ko miyamanalamat?
آية رقم 54
Na igira a miyakaoma rka so siran a paparatiyayaan iran so manga ayat Ami, na tharoang ka a: "So kalilinatad na sii rkano. Tiyangkd o Kadnan iyo ko ginawa Niyan so kapangalimo. Mataan aya! a sadn sa miyakanggolawla rkano sa marata sii ko di katao, oriyan iyan na mithawbat ko oriyan iyan, go miphiyapiya, na mataan! a so Allah na Manapi, a Makalimoon."
آية رقم 55
ﭿﮀﮁﮂﮃﮄ
ﮅ
Na lagid aya a gii Ami kazmpada magosay ko manga ayat. Go an mapayag so okit o manga baradosa.
آية رقم 56
Tharoang ka a: "Mataan! a sakn na inisapar rakn so kazoasoata ko ko siran a pphanongganowin iyo a salakaw ko Allah." Tharoang ka a: "Di akn pagonotan so manga kabaya iyo a ribat, ka miyadadag ako dn, o siyowa akn oto, go kna a ba ako pd ko miyamakaontol."
آية رقم 57
Tharoang ka a: "Mataan! a sakn na thatakna ko marayag a karina a phoon ko Kadnan ko, a piyakambokhag iyo Skaniyan. Kna a ba rakn zisii so pphagalokalokan iyo (a siksa). Da ko kokoman oto inonta na rk o Allah. Ipkhokom Iyan so bnar, go Skaniyan i taralbi a mapiya ko manga kokoman."
آية رقم 58
Tharoang ka a: "Opama ka mataan! a zisii rakn so phagalokalokan iyo, na minitaman dn so khasowa ko lt akn ago so lt iyo, na so Allah na katawan Iyan so da pamaginontolan."
آية رقم 59
Na zisii Rkaniyan so manga gonsi o migagaib, da a matao ron a rowar Rkaniyan. Go katawan Iyan so zisii ko kalopaan go so kalodan. Go da a khawlog a raon a ba Niyan di katawi skaniyan. Go da a od a matatago ko manga lilibotng ko lopa, go da a mawasa, go da a mamara, a ba di matatago ko kitab a mapayag (so Laoh Mahfodh).
آية رقم 60
Go Skaniyan so pthangan rkano ko gagawii, (ko kapthoroga rkano), go katawan Iyan so miyapasad iyo ko dawndaw. Oriyan iyan na pphakagogona on kano Niyan roo; ka an mapopos so taalik a miyapnto; oriyan iyan na sii Rkaniyan so khandodan iyan oriyan iyan na phanotholn Iyan rkano so pinggolawla niyo.
آية رقم 61
Go Skaniyan so phakabaas, a kaporoan o manga oripn Iyan, go pzogoan kano Niyan sa (manga malaikat a) khisisiyap (rkano). Taman sa igira a miyakaoma ko isa rkano so kapatay, na tangann Skaniyan o manga sogo Ami (a manga malaikat), a siran na di siran pphasipasin.
آية رقم 62
Oriyan iyan na pakakasowin siran ko Allah, a Kadnan iran a bnar. Tanodan ka rk Iyan so kokoman, go Skaniyan i lbi a magaan ko manga pagiitong.
آية رقم 63
Tharoang ka: "Ba adn a phakasabt rkano ko manga lilibotng ko kalopaan go so kalodan, a kaphangangarapanan iyo Skaniyan sa mapayag a kapangalimbabaan ago masoln (maptharo iyo a:) ´Ibt o sabta kami Niyan sii, na khabaloy kami dn a pd ko miyamanalamat´?"
آية رقم 64
Tharoang ka a: "So Allah na pzabtn kano Niyan on, go so langowan o boko, oriyan iyan na skano na ipphanakoto niyo!"
آية رقم 65
Tharoang ka a: "Skaniyan so Phakagaga sa katalingomai Niyan rkano sa siksa, a phoon ko kaporoan iyo odi na phoon ko kababaan o manga ai niyo, odi na pakarimbotan kano Niyan, sa kapakathitindga, go pakitintiman Iyan ko sabaad rkano so bagr o sabaad." Pamimikiranang ka so ropaan a gii Ami kazalinsalina magosay ko manga ayat, ka an iran kasaboti.
آية رقم 66
Na piyakambokhag aya o pagtawng ka, a skaniyan so bnar. Tharoang ka a: "Kna a ba kano rakn sasarign;"
آية رقم 67
ﯰﯱﯲﯳﯴﯵ
ﯶ
"Oman i thothol na adn a pkhatanaan iyan, na katokawan iyo bo."
آية رقم 68
Na igira a miyailaing ka so siran a pphagizawizaw ko manga ayat Ami, na talikhoding ka siran taman sa di aya pagizawizawn iran na tothol a salakaw ron. Na o malipat ka o shaytan, na di ka pagontod ko oriyan o kapakatadm ka, a pd o pagtaw a da pamaginontolan.
آية رقم 69
Na da a paliyogat ko siran a khipanananggila ko kapphamagitonga kiran a mayto bo, na ogaid na pananadm, ka an siran makapananggila.
آية رقم 70
Na ganating ka so siran a biyaloy iran so agama iran a katmbangan go kabimbanan, go miyalimpang siran o kawyagoyag ko doniya. Na pamakitadming ka a Qor´an nai: Ka oba adn a kabinasaan a ginawa sa sabap ko pizokat iyan: da a bagian iyan a salakaw ko Allah a Panarigan go da a phangalbalb. Na apiya iyaon iyan (sa ginawa niyan) so langowan o ipagaon na di ron matarima: Siran man so kiyabinasaan sabap ko pizokat iran: Na bagian iran so inomn a phlikabo a ig go so siksa a malipds: Sabap ko da iran kaparatiyaya.
آية رقم 71
Tharoang ka (ya Mohammad): "Ino Ami zimbaa a salakaw ko Allah so di rkami phakanggay a gona, go di rkami phakamorala, - go ba kami pmbaklid ko manga talikhodan ami ko oriyan o masa a kiyatoroa rkami o Allah? - lagid o diyadag skaniyan o shaytan sii ko lopa, a pkhataataap, adn a manga bolayoka iyan a pthawagn iran sii ko toroan, sa song ka rkami." Tharoang ka a: "Mataan! a so toroan o Allah na giyoto i toroan, na inisogo rkami a kambayorantang ami ko Kadnan o manga kaadn;"
آية رقم 72
Go giya kipamayandgn iyo ko sambayang go onoti niyo Skaniyan: Na Skaniyan so Ron kano plimoda.
آية رقم 73
Go Skaniyan so (Allah a) miyadn ko manga langit ago so lopa sii ko bnar: Na sii ko alongan a tharoon Iyan so: "Kon," na khaadn. Aya katharo Iyan na so bnar. Na rk Iyan so kapaar ko alongan a kaiyopa ko pariyop o sanggakala. Katawan Iyan so gaib ago so mapayag. Go Skaniyan so Mawngangn, a Kaip.
آية رقم 74
Na gowani na pitharo o Ibrahim ko ama iyan a Azar: "Ino ka pphangmbaal sa manga barahala a manga katohanan? Mataan! a sakn na pkhaylay akn ska, go so pagtawng ka ko kadadag a mapayag."
آية رقم 75
Na lagid aya a kapphakiilayn Ami ko Ibrahim ko mala a kapaar ko manga langit go so lopa, ka an mabaloy a pd ko mithotomangkd.
آية رقم 76
Na kagiya a makalibotng rkaniyan so gagawii, na miyakaylay sa bitoon, na miyatharo iyan a: "Giyaya i Kadnan ko." Na kagiya a somdp, na miyatharo iyan a: Di ko khabayaan so pphamandp.
آية رقم 77
Na kagiya a maylay niyan so olan a pzbang, na miyatharo iyan a: "Giyaya i Kadnan ko. Na kagiya a somdp, na miyatharo iyan a: Ibt o di ako toroa o Kadnan ko, na khabaloy ako dn a pd ko pagtaw a miyangadadadag."
آية رقم 78
Na kagiya a maylay niyan so alongan a pzbang, na miyatharo iyan a: "Giyaya i Kadnan ko: Ka giyaya i mala." Na kagiya a somdp, na miyatharo iyan a: "Hay pagtaw akn, mataan! a sakn na angiyas ako ko ipphamanakoto niyo."
آية رقم 79
"Mataan! a sakn na inibantak akn so hadap akn ko Allah a mimbaas ko manga langit go so lopa, a mbabayorantang ako, go di ako pd ko manga pananakoto."
آية رقم 80
Na miyakiphawala on so pagtaw niyan. Pitharo iyan a: "Ino kano rakn gii pakiphawala, makapantag ko Allah, a sabnar a tiyoro ako Niyan? Na da a ikhalk akn ko ipzakoto niyo Rkaniyan a mayto bo: Inonta sa kabaya o Kadnan ko. Mararangkom o Kadnan ko a katao so langowan taman. Ino kano di phananadm?"
آية رقم 81
"Na andamanaya i kikhalkn ko ko ipphanakoto niyo, na di niyo ikhalk a mataan! a skano na piyaki sakotowan iyo so Allah, da a initoron Iyan rkano ron a karina? Na anda ko dowa ka sagorompong i kiyapatotan ko sarig? o skano na katawi niyo."
آية رقم 82
"So miyamaratiyaya, go da iran kmbotn ko paratiyaya iran so kapanakoto, na siran man i kiyapatotan ko sarig, go siran i miyamakaontol."
آية رقم 83
Na giyoto i karina Mi, a inibgay Ami oto ko Ibrahim makapantag ko pagtaw niyan: Ipphoro Ami ko manga daradat so taw a kabaya Ami: Mataan! a so Kadnan ka na Mawngangn, a Matao.
آية رقم 84
Na inibgay Ami ron so Is´haq go so Ya´qob; oman i isa kiran na tiyoro Ami. Go so Noh, na tiyoro Ami ko miyaonaan iyan, na pd ko moriyataw niyan so Dawood, go so Solayman, go so Ayyob, go so Yosof, go so Mosa, go so Haron: Na lagid aya a kambalasi Ami ko miphipiyapiya:
آية رقم 85
Go so Zakariya, go so Yahya, go so Eysa, go so Ilyas: Oman i isa kiran na pd ko manga bilangataw:
آية رقم 86
Go so Ismail, go so Al-Yasa´, go so Yonos, go so Lot: Na oman i isa kiran na inilbi Ami ko manga kaadn (ko masa iran):
آية رقم 87
Go so sabaad ko manga loks iran, go so manga moriran a taw, go so manga pagari ran: Na pinili Ami siran, go tiyoro Ami siran ko okit a makaoontol.
آية رقم 88
Giyaya man so toroan o Allah a thoroon Iyan sa sabap Rkaniyan so taw a kabaya Iyan, ko manga oripn Iyan. Na opama ka miyanakoto siran, na miyaylang kiran dn so pinggalbk iran.
آية رقم 89
Siran man so inibgay Ami kiran so kitab, go so ongangn, go so kananabii: Na amay ka ongkirn aya o siran aya, na sabnar a inisarig Ami aya sa pagtaw a kna a ba iran aya di paparatiyayaa.
آية رقم 90
Siran man so tiyoro o Allah: Na so toroan kiran i onoting ka skaniyan; tharoang ka a: "Da a phangning ko rkano saya a sokay: da a salakaw rkaniyan a rowar sa ndao ko manga kaadn."
آية رقم 91
Na da iran slaan ko Allah so titho a kala Iyan, gowani ko tharoon iran a: "Da a initoron o Allah ko manosiya a mayto bo." Tharoang ka a: "Antawa onon i tomiyoron ko kitab a so minioma skaniyan o Mosa? - a sindaw ago toroan ko manga manosiya: Ipphanorat iyo to ko manga daptar na pphayagn iyo to, na madakl a pphagmaan iyo ron: Na minindao rkano so di niyo katawan, skano go di katawan o manga loks iyo." Tharoang ka a: "So Allah (i tomiyoron on):" Oriyan iyan na ganating ka siran ko gi iran kandadab a mabibimban siran.
آية رقم 92
Na giyang kaya (a Qor´an) na kitab a initoron Ami skaniyan, a ndadaklan o mapiya, a miyakatanto ko miyaonaan iyan: Go an ka mipamakaiktiyar ko (taw sa Makkah a) pompongan o manga ingd ago so makaliliyot on. Na so miyamaratiyaya ko akhirat na paparatiyayaan iran aya, go siran na so sambayang iran na sisyapn iran.
Na ba adn a taw a lawan a darowaka ko taw a inangkob iran so Allah sa kabokhag, odi na pitharo iran a: "Inilahaman ako," a da a iniilaham on a mayto bo, go so taw a pitharo iran a: "Phakatoron ako sa lagid o initoron o Allah?" Na opama ka maylaing ka amay ka so da pamaginontolan na matago ko manga kabrg ko kapatay! - a so manga malaikat na oolangn iran so manga barokan iran, (sa gi iran tharoon a:) "Pakaliyowa niyo so manga niyawa niyo: Sa alongan nai na imbadal rkano so siksa a kahinaan, - sabap ko skano na ipphangangkob iyo ko Allah so di bnar, go skano na so manga ayat Iyan na pphmaratabatan niyo!"
آية رقم 94
Na (tharoon kiran a:) "Sabnsabnar a miyakaoma kano Rkami a manga tawantawan lagid o kiyaadna Mi rkano ko paganay a kiyaokitan: Na kiyaganatan iyo (sa doniya) so inibgay Ami rkano ko tampar ko manga talikhodan iyo: Na da a khaylay Ami a pd iyo ko manga panandigan iyo a siran so initgo niyo sa mataan! a siran na manga sakotowa siran rkano o Allah. Sabnsabnar a miyangappka so kiyakhokoyaptaan iyo, go miyaylang rkano so initgo niyo (a phamakaogop rkano)!"
آية رقم 95
Mataan! a so Allah i dii makambatkad ko manga od, go so od a korma. Pphakagmawn Iyan so oyagoyag a phoon ko miyatay, go pphakagmawn Iyan so miyatay a phoon ko oyagoyag. Giyoto man so Allah: Na andamanaya i kapthalikhod iyo?
آية رقم 96
Miyadn ko kapipita: Go biyaloy Niyan so gagawii a iddkha, go so alongan go so olan a ipphagitong. Giyoto man i taks o (Allah a) Mabagr, a Matao.
آية رقم 97
Go Skaniyan so miyadn rkano ko manga bitoon, ka an iyo gii mipnanao ko manga lilibotng ko kalopaan ago so kalodan: Sabnar a pizmpad Ami magosay so manga ayat ko pagtaw a tatakikn iran.
آية رقم 98
Go Skaniyan so miyadn rkano phoon ko ginawa a isa (a giyoto so Adam): Na adn a kapthaknaan go adn a kapmbtadan: Sabnar a pizmpad Ami magosay so manga ayat ko pagtaw a khisasabot.
آية رقم 99
Go Skaniyan so piyakatoron Iyan a phoon ko kawang so ig: Na piyakagmaw Ami sa sabap rkaniyan so mbarambarang a mangngto: Na adn a piyakagmaw Ami ron a gadong, na pphakagmawan Ami skaniyan sa onga a mapipingi; go pphakaphoon ko korma a phoon ko tandok iyan a manga talintang a maa-ampir: Go so manga pamomolan a manga anggor, go zayton, go dalimah, makapzasaropai go di makapzasaropai: Pagilaylaya niyo so onga niyan igira miyonga, go so kapakatoa niyan. Mataan! a adn a matatago roo man a titho a manga tanda ko pagtaw a mapaparatiyaya.
آية رقم 100
Na biyaloy iran a manga sakotowa o Allah so manga jinn, a inadn Iyan siran; go tiyakayan iran sa manga wata a mama, go manga wata a babay a kna a ba katao. Soti Skaniyan! go maporo a ka-aawat Iyan ko phropaan iran On!
آية رقم 101
Mimbaas ko manga langit ago so lopa: Andamanaya i kapmbawata Iyan a da a darodopa Iyan? Go aya miyadn ko langowan taman, go Skaniyan i Matao ko langowan taman.
آية رقم 102
Giyoto man so Allah, a Kadnan niyo! Da a tohan a inonta Skaniyan, a miyadn ko langowan taman. Na zoasoata niyo Skaniyan. Go Skaniyan i tomatanggong ko langowan taman.
آية رقم 103
Di khatndo Skaniyan o manga kaylay, na Skaniyan na mattndo Iyan so manga kaylay: Go Skaniyan i Lambasi-katao, a Kaip.
آية رقم 104
"Sabnar a adn a miyakaoma rkano, a manga karina, a phoon ko Kadnan iyo: Na sadn sa min´ngka on, na kapiyaan o ginawa niyan; na sa di ron magin´ngka, na ikabinasa niyan: Na kna a ba sakn i somisiyap rkano."
آية رقم 105
Na lagid aya a gii Ami kazalinsalina magosay ko manga ayat. Go kagiya oba iran matharo a: "Kiyapangadian ka," go kagiya an Ami oto mapakarayag ko pagtaw a manga tatao.
آية رقم 106
Kdgang ka so iniilaham rka a phoon ko Kadnan ka: Da a tohana inonta Skaniyan. Go talikhoding ka so manga pananakoto.
آية رقم 107
Na o kabaya o Allah, na di siran makapanakoto: Na da Ami ska pntoa a somisiyap kiran, go kna a ba siran rka pakiaakon.
آية رقم 108
Na di niyo pndadawrai so siran a pzimbaan iran a salakaw ko Allah, ka ndadawraan iran so Allah sa kapmalawani sabap ko di katao. Lagid aya a kiyapharasi Ami ko oman i pagtaw ko galbk iran. Oriyan iyan na so bo so Kadnan iran i khandodan iran, na phanotholn Iyan kiran so pinggolawla iran.
آية رقم 109
Na mizasapa siran ko Allah ko pithamanan o manga sapa iran, sa mataan! a o adn a makawma kiran a tanda, na pharatiyayaan iran dn oto. Tharoang ka a: "So manga tanda na sii bo ko Allah. Na antawaa i maphakatokaw kano niyan sa mataan aya! a o makatalingoma na di iran pharatiyayaan?"
آية رقم 110
Na mbangkiringn Ami so manga poso iran, go so manga kaylay ran, lagid o da iran on kaparatiyayaa ko paganay a kiyaokitan: Go mbotawanan Ami siran ko kadadadag iran, a gii siran mromparompak.
آية رقم 111
Na opama ka mataan! a Skami na piyakatoron Ami kiran so manga malaikat, go minimbitiyarai siran o miyamatay, go tinimo Ami kiran so langowan taman a minipagadapa (iran), na di siran dn maratiyaya, inonta o kabaya o Allah. Na ogaid na kadaklan kiran na di manga tatao.
آية رقم 112
Na lagid aya a kiyasnggay Ami ko oman i nabi sa ridoay, a manga shaytan ko manga manosiya, go so manga jinn, a ipphamodiyok o sabaad kiran ko sabaad so inirmasan a katharo, ka an siran maikmat. Na o kabaya o Kadnan ka, na di iran oto manggolawla: Na botawaning ka siran ago so gi iran mbabaasn;
آية رقم 113
Ka an on mitaliyadok so manga poso o siran a di miyamaratiyaya ko akhirat: Go an siran on masoat, go an iran gii manggolawla so siran na gi iran nggolawlaan (a dosa).
آية رقم 114
(Tharoang ka a:) "Ba adn a salakaw ko Allah a pmbabanogn akn a kokoman? - a Skaniyan so tomiyoron rkano ko kitab," a katatarotopan sa osayan. Na so siran a bigan Ami ko kitab, na katawan iran, a mataan! (a giya Qor´an aya na) initoron a phoon ko Kadnan ka a bnar. Na ding ka dn mbaloya a ginawang ka a pd ko pkhakadowadowaan.
آية رقم 115
Na miyasamporna so katharo o Kadnan ka a bnar ago ontol: da a phakasambi ko manga katharo Iyan: Go Skaniyan so Pphakan´g, a Matao.
آية رقم 116
Na amay ka onotan ka so kadaklan ko taw ko lopa, na khapokas ka iran ko lalan o Allah; ka da a phagonotan iran a rowar ko arangan: Go ba siran dn dii pangsar.
آية رقم 117
Mataan! a so Kadnan ka na Skaniyan i Matao ko taw a mapopokas ko lalan Iyan: Go Skaniyan i Matao ko khipakaoontol.
آية رقم 118
Na kang kano ko miyaaloy ron so ngaran o Allah, o skano na so manga ayat Iyan i paparatiyayaan iyo.
آية رقم 119
Na antonaa i sikap iyo (a maka-uurn rkano) sa di niyo kakhan ko miyaaloy ron so ngaran o Allah, a sabnar a pizmpad Iyan rkano magosay so kiyaram Iyan rkano inonta so kiyasngtan kano ron? Na mataan! a madakl a tanto a pphamakadadag sabap ko manga kabaya iran a ribat a kna a ba katao. Mataan! a so Kadnan ka na Skaniyan i Matao ko manga malawani.
آية رقم 120
Na ganati niyo so mapapayag a dosa, go so masoln on: Mataan! a siran a gii zokat ko dosa na imbalas kiran dn so pizokat iran.
آية رقم 121
Na di kano khan ko da on maaloy so ngaran o Allah: Ka mataan aya! a titho a kandarowaka. Na mataan! a so manga shaytan na titho a pphamodiyokn iran so manga salinggogopa iran, ka an kano iran mapphamawal. Na amay ka onotan iyo siran, na mataan! a skano na titho a manga pananakoto.
آية رقم 122
Ino so taw a aya btad iran na maatay, na inoyag Ami skaniyan, go singgayan Ami sa sindaw a sabap a pkhilalakaw niyan ko manga manosiya, ba lagid o taw a makaiibarat skaniyan sa matatago ko manga lilibotng, a di ron phakaawa? Lagid aya a kiyapharasi Ami ko da pamaratiyaya ko pinggolawla iran.
آية رقم 123
Go lagid aya a kiyasnggay Ami ko oman i ingd, sa manga ala ko manga rarata on i ongar, ka an siran on makapphagantangan sa marata: Na da a kapphagantanganan iran sa marata a rowar ko manga ginawa iran, sa di iran maiin´ngka.
آية رقم 124
Na igira adn a miyakaoma kiran a tanda, na tharoon iran a: "Di ami dn pharatiyayaan taman sa di kami kabgan sa lagid o inibgay ko manga sogo o Allah. So Allah i Matao sa sadn sa ipkhidiya Niyan ko sogoan Iyan. Na khasogat dn so siran a mimamarata i ongar a kapakayto sii ko Allah, go siksa a sangat, sabap ko kiyapagantangan iran sa marata."
آية رقم 125
Na sadn sa kabaya o Allah a katoroa Niyan on, - na phakaloagn Iyan so rarb iyan ko kambayorantang; go sadn sa kabaya Iyan a kadadaga Niyan on, na mbaloyn Iyan so rarb iyan a maggt a masimpit, lagid oba pphanakdg ko kawang: Lagid oto a kipznggayn, o Allah ko siksa ko siran a di mapaparatiyaya.
آية رقم 126
Na giya ungkai (a Islam) i lalan o Kadnan ka, a makaoontol: Sabnar a pizmpad Ami magosay so manga ayat ko pagtaw a khipakatatadm.
آية رقم 127
Bagian iran so ingd a kalilintad sii ko Kadnan iran: Go Skaniyan i Panarigan iran, sabap ko pinggolawla iran (a mapiya).
آية رقم 128
Na sii ko gawii a kalimoda Niyan kiran langon, (na tharoon Iyan): "Hay malilimod a manga jinn! Sabnar a madakl a liyalong iyo ko manga manosiya." Na tharoon o manga salinggogopa iran a pd ko manga manosiya: "Kadnan ami, kiyasawitan o sabaad rkami so sabaad: Na inisampay kami ko diyandi ami a so inidiyandii Ka rkami." Tharoon Iyan a: "So apoy i darpa iyo: Makakakal kano ron dn, inonta sa kabaya o Allah. Mataan! a so Kadnan ka na Mawngangn, a Matao."
آية رقم 129
Na giyaya i gii Ami kapakikhapaarn ko sabaad ko manga darowaka ko sabaad, sabap ko pizokat iran.
آية رقم 130
"Hay kasamasama o manga jinn go manga manosiya! Ba da a miyakatalingoma rkano a manga sogo a pd rkano, a mapphanothol iran rkano so manga ayat Akn, go mipphamakaiktiyar iran rkano so kitmo ko alongan iyo wai?" Tharoon iran: "Pizaksian ami a sala so manga ginawa mi. Na miyakalimpang kiran so kawyagoyag ko doniya. Na zaksian iran a ginawa iran sa mataan! a siran na da pamaratiyaya."
آية رقم 131
Giyoto man na mataan! a da ko btad o Kadnan ka oba Niyan binasaa so manga ingd sabap ko kiyandarowaka, a ba so taw ron na di makaiin´ngka.
آية رقم 132
Na rk o oman i isa so manga daradat ko pinggolawla iran: Ka da ko Kadnan ka i ba Niyan kalilipati so gi iran nggolawlaan.
آية رقم 133
Na so Kadnan ka i Kawasa, a Khirk ko limo: O kabaya Iyan, na khaylang kano Niyan, go phakasambi (sa pagtaw) ko oriyan iyo sa sadn sa kabaya Iyan, izan o kiya adn a Niyan rkano a miyakapoon ko moriyataw o pagtaw a salakaw.
آية رقم 134
Mataan! a so diyandi rkano na phakatalingoma dn: Go di niyo dn kapalagoyan.
آية رقم 135
Tharoang ka (ya Mohammad): "Hay pagtaw akn, nggalbk kano sa sadn sa kapasang iyo: Ka mataan! a pnggalbk ako mambo: Na katokawan iyo bo o antawaa i khabaloy a rk iyan so mababantog a ingd: Mataan aya! a di phakaslang sa maliwanag so da pamaginontolan."
آية رقم 136
Na singgayan iran so Allah ko inadn Iyan a manga prpran go manga ayam, sa kipantag: Na pitharo iran a: "Giyaya na bagian o Allah sii ko tgo iran a kabokhag: Go giyaya na bagian o ipphamanakoto ami!" Na so miyabaloy a bagian o ipphamanakoto iran na di ipraot ko Allah, na so miyabaloy a bagian o Allah na ipraot ko ipphamanakoto iran. Mikharatarata so ipkhokom iran!
آية رقم 137
Na lagid aya a kiyapharasi Niyan ko madakl ko manga pananakoto, ko kapmbonoa ko manga wata iran o ipphamanakoto iran, ka an iran siran mabinasa, go an iran siran karimboti ko agama iran, na opama ka kabaya o Allah, na di iran oto manggolawla: Na botawaning ka siran ago so gi iran mbabaasn a kabokhag.
آية رقم 138
Na pitharo iran a: Giya manga ayam ai go giya prpran nai na inisapar, da a phakakan on a inonta so kabaya ami sii ko tgo iran a kabokhag go manga ayam a inisapar so karorani ko manga likod iyan, go manga ayam a di iran on pagalowin so ngaran o Allah; - a ipphangangkob on: Mbadalan Iyan siran dn ko ipphangangkob iran on.
آية رقم 139
Go pitharo iran a: "So matatago ko manga tiyan angkai a manga ayam na kabisa o manga mama rktano, na kiyaram ko manga karoma tano;" na amay ka mabaloy a maatay, na thompotompok siran on. Mbadalan Iyan siran ko iniropa iran (a kabokhag): Mataan! a Skaniyan na Mawngangn, a Matao.
آية رقم 140
Sabnar a miyalogi so siran a piyamono iran so manga wata iran, sa kalalalongan, kna a ba katao, go kiyaram iran so pagpr kiran o Allah, a iniangkob ko Allah. Sabnar a miyadadag siran go da siran makakdg sa ontol.
آية رقم 141
Na Skaniyan so (Allah a) miyadn ko manga sapad, a gii mithaataar, go di mipthaataar, go so korma, go so prpran, a mbidabida a kapkhanawn: Go zayton, go so dalima a makapzasaropai, go di makapzasaropai: Kan kano ko onga niyan igira a miyonga, go tonaya niyo so zakat iyan ko alongan a kapragonawn; go di kano pthabowakar: Ka mataan! a Skaniyan na di Niyan khabayaan so manga tabowakar.
آية رقم 142
Go (inadn Iyan) so sabaad ko manga ayam a pkharoranan go di kharoranan: Kang kano ko pagpr rkano o Allah, go di niyo khdga so manga okit o shaytan: Mataan! a Skaniyan na ridoay niyo a mapayag.
آية رقم 143
Walo a nggaganapa: Sii ko bilibili a dowa, go sii ko kambing a dowa; tharoang ka a: Ba so dowa a mama i inisapar Iyan, antawaa so dowa a babay, antawaa so miyarangkom skaniyan o manga tiyan o dowa a babay? Panothola niyo rakn sii ko katao, o skano na manga bnar:
آية رقم 144
Go sii ko onta a dowa, go sii ko sapi a dowa. Tharoang ka a: Ba so dowa mama i inisapar Iyan, antawaa so dowa babay, antawaa so miyarangkom skaniyan o manga tiyan o manga babay? antawaa ba kano khipakadadarpa gowani a isogo rkano aya o Allah? Na ba adn a lawan a darowaka ko taw a inangkob iyan so Allah sa kabokhag, ka an iyan madadag so manga manosiya sa kna a ba katao? Mataan! a so Allah na di Niyan pnggonanaon so pagtaw a da pamaginontolan.
آية رقم 145
Tharoang ka (ya Mohammad) a: "Da a khatoon ko ko iniilaham rakn a inisapar ko khan a kakan iyan on, inonta o mabaloy a miyatay, odi na rogo a tomiyoga, odi na sapo o baboy, - ka mataan! a skaniyan na marzik - odi na kandarowaka, a inipanambay oto ko salakaw ko Allah." Na sadn sa kasngtan, a kna a ba darowaka, go di malawani, - na mataan! a so Kadnan ka na Manapi, a Makalimoon.
آية رقم 146
Na hiyaram Ami ko siran a manga Yahodi so oman i adn a kanoko niyan, go so sapi go so kambing, na hiyaram Ami kiran so manga sibo a dowa oto, inonta so kaa-awidan o manga likod a dowa oto, odi na so manga tinai, odi na so minilook ko tolan: Giyoto man i inibadal Ami kiran sabap ko kiyandarowaka iran: Na mataan! a Skami i titho a manga bnar.
آية رقم 147
Na o pakambokhaga ka iran, na tharoang ka a: "So Kadnan iyo i Khirk ko limo a rangkom; go da a phakarn ko siksa Iyan ko pagtaw a manga rarata i ongar."
آية رقم 148
Ptharoon o siran a miyamanakoto a: "Opama ka kabaya o Allah, na di kami makapanakoto, go di makapanakoto so manga loks ami; go da a misapar ami a mayto bo," lagid oto a kiyapakambokhaga o siran a miyaonaan iran (ko manga sogo), taman sa kiyataaman iran so siksa Ami. Tharoang ka a: "Ba adn a zisii rkano a katao? Na gmawn iyo rkami oto. Da a phagonotan iyo a rowar ko arangan: Ka ba kano dn gii pangsar."
آية رقم 149
Tharoang ka: "Na rk o Allah so karina a tarotop. Na o kabaya Iyan, na mataan! a khatoro kano Niyan langon."
آية رقم 150
Tharoang ka a: "Pakadarpaa niyo i manga saksi iyo a siran so pzaksian iran a mataan! a so Allah na hiyaram Iyan aya." Na o zaksi iran, na ding ka siran mbabida a kazaksi. Go ding ka pagonoti so manga kabaya o siran a piyakambokhag iran so manga ayat Ami, go siran na di iran paparatiyayaan so akhirat, a siran na so Kadnan iran na phrimbangn iran.
آية رقم 151
Tharoang ka a: "Song kano sii, ka batiyaang ko so hiyaram rkano o Kadnan iyo:" Di niyo phanakoton (so Allah) sa mayto bo; go (phiyapiya i niyo) so mbala a loks sa tanto a kaphiyapiya; go di niyo mbonoa so manga wata iyo sa phoon ko kamiskin; - ka Skami i pphagpr rkano ago so siran; - go di kano pagobay ko manga pakasisingay, so mapapayag on go so misosoln; go di niyo mbonoa so baraniyawa, a so inisapar o Allah, inonta o sii ko kabnar. Giyoto man na inisogo Iyan rkano to, ka an iyo sabota.
آية رقم 152
Go di niyo pagobaya so tamok o ilo, inonta o so kapiya niyan, taman sa iraot ko kakhasad iyan; go tarotopa niyo so kapagasad go so kathimbang sii ko kaontol; da a iphaliyogat Ami ko baraniyawa, a inonta so khagaos iyan; - na igira a ptharo kano, na paginontolan kano, apiya sii ko tonganay (niyo); go so diyandi o Allah na tomann iyo: Giyoto man i kinisogoon Iyan rkano ron, ka an iyo katanodi.
آية رقم 153
Na mataan! a giyaya i lalan Akn, a makaoontol. Na kdga niyo skaniyan. Go di niyo khdga so manga pd a lalan, ka mablag kano niyan ko lalan Iyan. Giyoto man i kinisogoon Iyan rkano ron, ka ang kano makapananggila.
آية رقم 154
Oriyan iyan na inibgay Ami ko Mosa so kitab, a tarotop ko miphiyapiya, go osayan ko langowan taman, - go toroan go limo, ka an iran maparatiyaya so kipthoonaan (iran) ko Kadnan iran.
آية رقم 155
Na giyang kaya (a Qor´an) na kitab a initoron Ami skaniyan a piyakandaklan sa mapiya: Na onoti niyo skaniyan, go pananggila kano, ka ang kano mipangalimo:
آية رقم 156
Ka oba niyo matharo a: "Aya bo a tiyoronan ko kitab na so dowa pagtaw ko miyaonaan ami, na mataan! a miyabaloy kami a titho a di somasabot ko kapphangadi iran;"
آية رقم 157
O di na oba niyo matharo i: "Opama ka mataan! a sii rkami initoron so kitab, na khabaloy kami dn a lbi a miyatoro a di siran." Na sabnar a adn a miyakaoma rkano a karina a phoon ko Kadnan iyo, - go toroan go limo. Na ba adn a lawan a darowaka ko taw a piyakambokhag iyan so manga ayat o Allah, go tiyalikhodan iyan oto? Imbalas Ami dn ko siran oto a pphamanalikhod ko manga ayat Ami, so marata a siksa, sabap ko kiyatalikhod iran.
آية رقم 158
Ba adn a pnayawn iran a rowar ko kapakatalingoma kiran o manga malaikat odi na so kapaka talingoma o Kadnan ka (hay Mohammad ko masa a kakokoma ko ndolon dolonan o manga oripn Iyan sa alongan a qiyamah). Odi na so kapakatalingoma o sabaad ko manga tanda o Kadnan ka (a so kazbang o alongan sa sdpan)? Sii ko alongan a kapakatalingoma o sabaad ko manga tanda o Kadnan ka, na di makanggay a gona ko ginawa so paratiyaya niyan, o da paratiyaya sa paganay, odi na da nggalbk ko paratiyaya niyan sa mapiya. Tharoang ka a: "Nayaw kano, ka mataan! a skami na nomanayaw kami (mambo)."
آية رقم 159
Mataan! a so siran a mizisibaya ko agama iran go mithitindga, na da a labot ka kiran a mayto bo: Ka so khasowa iran na sii bo (phakandod) ko Allah. Oriyan iyan na phanotholn Iyan kiran so pinggolawla iran.
آية رقم 160
Sa taw a mitalingoma niyan so mapiya, na adn a bagian iyan a sapolo a manga lagid iyan (a manga pipiya), go sa taw a mitalingoma niyan so marata, na da a imbalas on a rowar ko lagid iyan; sa di siran kasalimbotan.
آية رقم 161
Tharoang ka (ya Mohammad) a: "Mataan! a sakn na tiyoro ako o Kadnan ko ko lalan a makaoontol, - a okit a makasosogat, - a okit o Ibrahim a makaoontol, go kna a ba miyabaloy a pd ko manga pananakoto."
آية رقم 162
Tharoang ka a: "Mataan! a so sambayang akn, go so simba ko, go so kawyagoyag akn, go so kapatay akn, na rk o Allah a Kadnan o manga kaadn."
آية رقم 163
Daa sakotowa Iyan: Na giyaya i inisogo rakn, go sakn i paganay ko mimbabayorantang (ko Allah).
آية رقم 164
Tharoang ka: "Ba adn a salakaw ko Allah a pmbabanogn ko a Kadnan, a Skaniyan i Kadnan o langowan taman? Na da a khasokat o oman i ginawa (a dosa) a ba on di pthagorar: Go di khaawidan o maawid so awid o pd iyan. Oriyan iyan na so bo so Kadnan iyo i khandodan iyo: Na phanotholn Iyan rkano so nganin a skano na di niyo to phagayonayonan."
آية رقم 165
Go Skaniyan so miyadn rkano a manga khalifah ko lopa. Go piyakaombaw Niyan so sabaad rkano, ko kaporoan o sabaad sa manga daradat: Ka thpngan kano Niyan ko inibgay Niyan rkano. Mataan! a so Kadnan ka na magaan i kandadan´g, go mataan! a Skaniyan na titho a Manapi, a Makalimoon.
تقدم القراءة