ترجمة معاني سورة الذاريات باللغة الأوزبكية من كتاب الترجمة الأوزبكية - علاء الدين منصور

علاء الدين منصور

الترجمة الأوزبكية - علاء الدين منصور

علاء الدين منصور

الذهاب لصفحة الكتاب

ﰡ

آية رقم 1

ﯤﯥ ﯦ

1. (Булутларни) суриб кетгувчи (шамол)ларга қасам;

آية رقم 2

ﯧﯨ ﯩ

2. Юк (ёмғир) ташигувчи (булут)ларга қасам;

آية رقم 3

ﯪﯫ ﯬ

3. (Сув юзида) енгил сузиб боргувчи (кема)ларга қасам;

آية رقم 4

ﯭﯮ ﯯ

4. Ва (Аллоҳнинг амри билан барча) иш(лар)ни тақсимлагувчи (фаришта)ларга қасамки,

آية رقم 5

ﯰﯱﯲ ﯳ

5. сизларга ваъда қилинаётган нарса (қайта тирилиш) шак-шубҳасиз, ҳаққи-ростдир!

آية رقم 6

ﯴﯵﯶ ﯷ

6. Ва албатта (Қиёмат Кунида ҳисоб-китоб қилинганидан кейин) жазо-мукофот воқеъ бўлгувчидир.

آية رقم 7

ﭑﭒﭓ ﭔ

7. (Самодаги юлдузлар ҳаракат қиладиган) йўллар эгаси бўлган осмонга қасамки,

آية رقم 8

ﭕﭖﭗﭘ ﭙ

8. албатта сизлар (ушбу пайғамбар хусусида) хилма-хил сўз устидадирсизлар.
____________________
И з о ҳ. Яъни, худди самодаги сайёраларнинг ҳаракат қиладиган йўллари хилма-хил бўлгани каби сизлар ҳам, эй мушриклар, Пайғамбар алайҳис-салоту вас-салом ҳақида турли-туман сўзлар айтурсизлар: айримларингиз у зотни «сеҳргар», десангизлар, бошқаларингиз «шоир», дейсизлар.

آية رقم 9

ﭚﭛﭜﭝ ﭞ

9. Ундан (яъни, Қуръондан, пайғамбардан Аллоҳнинг илми азалийсида ҳидоят йўлидан) бурилган (ва саодатдан маҳрум қилинган) кимса бурилиб (юз ўгириб) кетур.

آية رقم 10

ﭟﭠ ﭡ

10. (Ҳақ пайғамбарни «ёлғончи, сеҳргар, шоир» дегувчи) ўша ёлғончиларга ўлим — лаънат бўлгай!

آية رقم 11

ﭢﭣﭤﭥﭦ ﭧ

11. (Жаҳолат) гирдобида адашиб юргувчи бўлган кимсаларга (ўлим бўлгай!)

آية رقم 12

ﭨﭩﭪﭫ ﭬ

12. Улар жазо (Қиёмат) Куни қачон бўлишини сўрарлар.

آية رقم 13

ﭭﭮﭯﭰﭱ ﭲ

13. (У Кун) улар дўзахда текшириладиган — ёндириладиган Кунда бўлур.

آية رقم 14

ﭳﭴﭵﭶﭷﭸﭹ ﭺ

14. (Ўшанда уларга айтилур): «Азобларингизни тотинглар! Сизлар (ҳаёти дунёдалик пайтингизда) шоштиргувчи бўлган нарса мана шудир!»

آية رقم 15

ﭻﭼﭽﭾﭿ ﮀ

15. Албатта тақводор зотлар жаннатлар ва булоқлар устида бўлурлар.

آية رقم 16

ﮁﮂﮃﮄﮅﮆﮇﮈﮉﮊ ﮋ

16. (У Кунда) Парвардигор ўзларига ато этган нарсаларни (ажр-мукофотларни) қабул қилган ҳолларида (жаннатлар ва булоқлар устида бўлурлар). Зеро, улар бундан илгари (яъни, ҳаёти дунёдалик чоғларида) чиройли амаллар қилгувчи эдилар.

آية رقم 17

ﮌﮍﮎﮏﮐﮑ ﮒ

17. Улар кечадан озгина (фурсатгина) кўз юмар эдилар.

آية رقم 18

ﮓﮔﮕ ﮖ

18. Ва саҳарларда улар (қилган саҳву-хатолари учун Парвардигордан мағфират сўрар эдилар.

آية رقم 19

ﮗﮘﮙﮚﮛ ﮜ

19. Уларнинг мол-мулкларида сўрагувчи ва (мол-давлатдан) маҳрум-муҳтож кишилар учун (ажратилган) ҳақ-улуш бўлар эди.

آية رقم 20

ﮝﮞﮟﮠ ﮡ

20. (Эй инсонлар), Ерда (ундаги тоғу тошлар ва водий-дараларда, денгизлар ва дарёларда, ҳайвонот ва наботот оламида) ишонгувчи зотлар учун (Аллоҳнинг қудратига далолат қиладиган) оят-аломатлар бордир.

آية رقم 21

ﮢﮣﮤﮥﮦ ﮧ

21. Ҳамда ўзларингизда (ушбу ҳаётга келиб-кетишингиздан тортиб, вужудларингиздаги ҳар бир аъзоингизда, балки ҳар бир ҳужайрангизнинг нақадар нозик тартиб-интизом билан яратилиб, ўз ўрнига жойлаштирилганида ва ўз зиммасидаги Яратган буюрган вазифани қулоқ қоқмасдан адо этиб боришида Аллоҳнинг қудратига далолат қиладиган оят-аломатлар бордир). Ахир кўрмайсизларми?!

آية رقم 22

ﮨﮩﮪﮫﮬ ﮭ

22. Осмонда эса сизларнинг ризқу рўзларингиз (яъни, Ерда мўл ҳосил бўлишига сабаб бўлгувчи ёмғир) ва сизларга ваъда қилинаётган нарса (яъни, жаннат) бордир.

آية رقم 23

ﮮﮯﮰﮱﯓﯔﯕﯖﯗ ﯘ

23. Бас, осмон ва Ернинг Парвардигорига қасамки, албатта у (яъни, сизларга ваъда қилинаётган барча нарса) худди сизларнинг сўзлашингиз каби (яъни, сўзлаган сўзларингиз ўзларингиз учун қандоқ ҳақ бўлса, ана шундай) ҳаққи-ростдир!

آية رقم 24

ﯙﯚﯛﯜﯝﯞ ﯟ

24. (Эй Муҳаммад алайҳис-салоту вас-салом), сизга Иброҳимнинг иззат-икромли меҳмонлари ҳақидаги хабар келдими?

آية رقم 25

ﯠﯡﯢﯣﯤﯥﯦﯧﯨﯩ ﯪ

25. Ўшанда улар (Иброҳимнинг) ҳузурига кириб, «Салом», дейишган эди, у ҳам: «Салом, (Булар) нотаниш қавм-ку?», деди.

آية رقم 26

ﯫﯬﯭﯮﯯﯰ ﯱ

26. Сўнг у аста оиласи олдига чиқиб, (қовурилган) бир семиз бузоқни келтирди-да,

آية رقم 27

ﯲﯳﯴﯵﯶ ﯷ

27. уни уларга яқин қилиб, «(Таомдан) емайсизларми?», деди.

آية رقم 28

ﯸﯹﯺﯻﯼﯽﯾﯿﰀﰁﰂ ﰃ

28. (Лекин меҳмонлар овқатга қўл чўзишмагач), улардан хавфсирай бошлади. (Шунда) улар: «Қўрқмагин. (Бизлар фаришталармиз, шунинг учун таом емаймиз)», дедилар ва (Иброҳимга) бир доно ўғил хушхабарини бердилар.

آية رقم 29

ﰄﰅﰆﰇﰈﰉﰊﰋﰌ ﰍ

29. Шунда (уларнинг сўзини эшитиб турган Иброҳимнинг) хотини қичқирганча келди-да, (бу хушхабардан ажабланганидан) ўзининг юзига уриб: «(Ахир мен) туғмас кампир(ман)ку!», деди.

آية رقم 30

ﰎﰏﰐﰑﰒﰓﰔﰕﰖ ﰗ

30. Улар айтдилар: «Парвардигоринг мана шундай деди. Албатта Унинг Ўзигина ҳикмат ва билим Соҳибидир».

آية رقم 31

ﭑﭒﭓﭔﭕﭖ ﭗ

31. (Иброҳим) деди: «Эй элчилар, не юмуш билан келдингиз?»

آية رقم 32

ﭘﭙﭚﭛﭜﭝ ﭞ

32. Улар айтдилар. «Бизлар бир жиноятчи қавмга (яъни, Лут қавмига) юборилгандирмиз.

آية رقم 33

ﭟﭠﭡﭢﭣ ﭤ

33. Уларнинг устидан лойдан-сополдан бўлган тошни ёғдириш учун (юборилгандирмиз).

آية رقم 34

ﭥﭦﭧﭨ ﭩ

34. Парвардигорнинг ҳузурида ҳаддан ошувчи кимсалар учун белгилаб қўйилган (яъни, ҳар бир ҳалок қилингувчи кофирнинг номи ёзилган тошни ёғдириш учун юборилгандирмиз).

آية رقم 35

ﭪﭫﭬﭭﭮﭯ ﭰ

35. Бас, Биз у жойдаги мўминлардан бўлган кишиларни чиқариб юбордик.

آية رقم 36

ﭱﭲﭳﭴﭵﭶﭷ ﭸ

36. (Лекин) у жойда бир хонадондан (яъни, Лут пайғамбар хонадонидан) ўзга мусулмонларни топмадик.

آية رقم 37

ﭹﭺﭻﭼﭽﭾﭿ ﮀ

37. Биз (у қишлоқдаги барча кофирларни ҳалок қилганимиздан сўнг) аламли азобдан қўрқадиган зотлар (ибрат олишлари) учун у жойда оят-аломат қолдирдик.
____________________
И з о ҳ. Ушбу ояти каримада Аллоҳнинг қудратига далолат қиладиган оят-аломатлардан фақат Охиратдаги аламли азобдан қўрқадиган кишиларгина панд-насиҳат олишлари таъкидлаб ўтилди. Энди, Иброҳим алайҳиссаломга юборилган фаришталар ва уларнинг Лут қавмидан кофир бўлган кимсаларни ҳалок қилганлари ҳақидаги ибратли қисса ҳикоя қилингач, навбатдаги оятларда кофир бўлганлари сабабли ҳалокатга дучор қилинган бошқа бир қанча қавмлар тўғрисида қисқача хабарлар берилади.

آية رقم 38

ﮁﮂﮃﮄﮅﮆﮇﮈ ﮉ

38. Мусо (қиссаси)да ҳам (ибрат бордир). Эсланг, Биз уни очиқ ҳужжат билан Фиръавн олдига юборган эдик.

آية رقم 39

ﮊﮋﮌﮍﮎﮏ ﮐ

39. У ўз аркони (давлати)га суяниб (Мусога иймон келтиришдан) юз ўгирди ва «(Мусо ё) сеҳргар, ёки мажнун», деди.

آية رقم 40

ﮑﮒﮓﮔﮕﮖﮗ ﮘ

40. Бас, Биз уни ҳам, қўшинларини ҳам ушлаб, уларни денгизга отдик — ғарқ қилиб юбордик. У (Фиръавн ўзининг кибру ҳавоси ва куфру исёни сабабли ҳар қандай) маломатга лойиқдир.

آية رقم 41

ﮙﮚﮛﮜﮝﮞﮟ ﮠ

41. Од (қабиласининг қиссаси)да ҳам (ибрат бордир). Эсланг, Биз уларнинг устига туғмас (яъни, ҳеч қандай фойда етказмайдиган) бўронни юборган эдик.

آية رقم 42

ﮡﮢﮣﮤﮥﮦﮧﮨﮩ ﮪ

42. У (бўрон) ниманинг устидан ўтса, албатта уни (ҳалок этиб) худди чириб-битган суяклар каби қилиб қўяр эди.

آية رقم 43

ﮫﮬﮭﮮﮯﮰﮱﯓ ﯔ

43. Самуд (қабиласининг қиссаси)да ҳам (ибрат бордир). Эсланг, уларга (Аллоҳ томонидан мўъжиза қилиб юборилган туяни сўйиб юборган пайтларида) «бир вақтгача (яъни, уч кунгача тириклик неъматидан) баҳраманд бўлингиз», дейилган эди.

آية رقم 44

ﯕﯖﯗﯘﯙﯚﯛﯜ ﯝ

44. Бас, улар Парвардигорнинг амри(га игоат этиш)дан кибр-ҳаво қилишгач, қараб турган ҳолларида уларни чақмоқ урди.

آية رقم 45

ﯞﯟﯠﯡﯢﯣﯤ ﯥ

45. Бас, улар (у чақмоқдан қочиб қутулиш учун ўринларидан) туришга ҳам қодир бўлмадилар ва (бирон кимса томонидан) ёрдам олгувчи ҳам бўлмадилар!

آية رقم 46

ﯦﯧﯨﯩﯪﯫﯬﯭﯮ ﯯ

46. (Мазкур қавмлардан) илгари Нуҳ қавмини ҳам (ҳалок қилгандирмиз). Чунки улар фосиқ-итоатсиз қавм эдилар.

آية رقم 47

ﯰﯱﯲﯳﯴ ﯵ

47. Осмонни Биз қудрат билан барпо қилдик. Дарҳақиқат, Биз қудратлидирмиз.

آية رقم 48

ﯶﯷﯸﯹ ﯺ

48. Ерни эса ёйиқ-кенг қилиб қўйдик. Бас, (Биз) нақадар яхши ёйгувчидирмиз.

آية رقم 49

ﯻﯼﯽﯾﯿﰀﰁ ﰂ

49. Сизлар эслатма-ибрат олишларингиз учун Биз ҳар бир нарсани жуфт-жуфт қилиб яратдик.

آية رقم 50

ﰃﰄﰅﰆﰇﰈﰉﰊﰋ ﰌ

50. (Эй Муҳаммад алайҳис-салоту вас-салом), уларга айтинг: «Бас, Аллоҳга (иймон келтириш учун) чопинглар-шошинглар! Албатта мен сизлар учун У зот(нинг азоби)дан очиқ огоҳлантиргувчидирман.

آية رقم 51

ﰍﰎﰏﰐﰑﰒﰓﰔﰕﰖﰗﰘ ﰙ

51. Ва сизлар Аллоҳ билан бирга яна бошқа бирон илоҳ бор, деманглар! Албатта мен сизлар учун У зот(нинг азоби)дан очиқ огоҳлантиргувчидирман».

آية رقم 52

ﭑﭒﭓﭔﭕﭖﭗﭘﭙﭚﭛﭜﭝ ﭞ

52. Худди шунингдек, (яъни, сизни сеҳргар, мажнун, шоир деганлари каби) улардан (яъни, Макка мушрикларидан) аввалги (кофир бўлган) кимсаларга бирон пайғамбар келганида, улар ҳам албатта (ўша пайғамбарни ё) сеҳргар ёки мажнун, дер эдилар.

آية رقم 53

ﭟﭠﭡﭢﭣﭤﭥ ﭦ

53. Улар ўша (сўз)ни бир-бирларига васият қилиб қолдирганмилар? Йўқ, (зотан улар бир-бирларидан йироқ замонларда ва маконларда яшаб ўтганлари сабабли ўзаро васият қилиш имконига эга эмаслар, лекин фақат бир нарса уларнинг барчаларини юқоридаги каби сўзларни айтишга мажбур этар) — улар туғёнга тушган қавмдирлар!

آية رقم 54

ﭧﭨﭩﭪﭫ ﭬ

54. Бас, (эй Муҳаммад алайҳис-салоту вас-салом), сиз улардан юз ўгиринг! Энди (зиммангиздаги пайғамбарликни тўла етказганингиздан сўнг кофирлардан юз ўгирсангиз) сиз маломат қилингувчи эмассиз.

آية رقم 55

ﭭﭮﭯﭰﭱ ﭲ

55. Ва (Қуръон билан) панд-насиҳат қилинг! Зеро, у панд-насиҳатлар мўминларга нафъ етказур.

آية رقم 56

ﭳﭴﭵﭶﭷﭸ ﭹ

56. Мен жин ва инсни фақат Ўзимга ибодат қилишлари учунгина яратдим.

آية رقم 57

ﭺﭻﭼﭽﭾﭿﮀﮁﮂ ﮃ

57. Мен улардан бирон ризқ истамасман ва улар Мени таомлантиришини истамасман.

آية رقم 58

ﮄﮅﮆﮇﮈﮉﮊ ﮋ

58. Зеро, Аллоҳнинг Ўзигина (барча халойиққа) ризқу рўз бергувчи, куч-қувват соҳиби ва қудратлидир.

آية رقم 59

ﮌﮍﮎﮏﮐﮑﮒﮓﮔ ﮕ

59. Бас, золим-кофир бўлган кимсалар учун шак-шубҳасиз, худди (илгари ўтган кофир) дўстларининг насибалари каби (азобдан иборат) насиба бордир. Бас, улар Мени(нг азобимни) шоштирмай қўя қолсинлар!

آية رقم 60

ﮖﮗﮘﮙﮚﮛﮜ ﮝ

60. Бас, кофир бўлган кимсалар учун уларга ваъда қилинаётган (азобга гирифтор қилинадиган) Кунларида ҳалокат бўлгай!

تقدم القراءة